މީދޫޓީމް ބަލިކޮށް ޓީމް ވޮރިއާސް ފައިނަލަށް

ޓީމް ވޮރިއާސްއާއި ބައްދަލުކޮށް ބަލިވުމުގެ ސަބަބުން މީދޫ ޓީމް ސަދަން ސްޕޯޓްސް  ވޮލީބޯޅަ މުބާރާތުން ކަޓައިފިއެވެ.

ބުރާސްފަތި ދުވަހުގެރޭ ފޭދޫ ވޮލީ ކޯޓްގައި ކުޅެވުނު ސެމީފައިނަލްމެޗްގައި ފޭދޫ ޓީމް ވޮރިއާސްއާއި  ބައްދަލުކޮށް މީދޫޓީމް ބަލިވީ 3 ސެޓް ދެސެޓުންނެވެ.

މިމެޗްގެ ފުރަތަމަ ސެޓް ޓީމް ވޮރިއާސް ހޯދާފައިވަނިކޮށް 2 ވަނަ ސެޓާއި 3 ވަނަ ސެޓް ހޯދީ މީދޫ ޓީމުންނެވެ. އަދި 4 ވަނަ ސެޓް ކުޅެމުންގޮސް 21 – 16 އިން މީދޫޓީމް ލީޑް ހޯދާފައިވަނިކޮށް ޓީމް ވޮރިއާސްއިން ވަނީ 21-21 އިން ސްކޯ އެއްވަރުކޮށް އަދި މިސެޓް 26-24 އިން ހޯދާފައެވެ.

މިސެޓްގެ ކުޅުމަށް ބަލާއިރު 5 ޕޮއިންޓްގެ ލީޑެއް މީދޫ ޓީމަށް ލިބިފައިވަނިކޮށް ފޭދޫ ޓީމްގެ ކުޅުންތެރިއަކު ސާވީސްކޮށް މެޗްގެ ސްކޯ 21-21 އިން އެއްވަރުކުރިއިރުވެސް އެސާވީސް ބްރޭކް ކުރުމަށް މީދޫޓީމްގެ އޮފިޝަލުން ޓައިމްއައުޓެއްވެސް އަދި ކުޅުންތެރިއަކު ބަދަލުކުރުންފަދަ ކަމެއްވެސް ކޮށްފައިނުވާކަން ފާހަގަކޮށްލަން ޖެހެއެވެ.

މިސެޓްގެ އެންމެ ފަހު ޕޮއިންޓް މީދޫޓީމްގެ ރޮޓޭޝަން ފައުލެއްކަމަށް ސެކެންޑް ރެފްރީ ދައްކާ ސެޓް ނިންމާލުމުން މީދޫޓީމްގެ އޮފިޝަނުންނާއި ކުޅުންތެރީން ރޮޓޭޝަން ފައުލްނުވާކަމަށްބުނެ ވަރަށްބޮޑަށް މައްސަލަ ޖައްސަމުން ގޮސްފައިވެއެވެ. އެހެން ނަމަވެސް ސެކެންޑް ރެފްރީ ފަސްޓް ރެފްރީއާއި ވާހަކަދެއްކުމަށްފަހު އެއީ ރޮޓޭޝަން ފައުލެއްކަމަށް ނިންމާ އެސެޓް ވަނީ 26-24 އިން ނިންމާފައެވެ.

ހަތަރުވަނަ ސެޓް މައްސަލަތަކެއްގެ ތެރެއިން ނިމިގެން ދިއުމަށްފަހު 5 ވަނަ ސެޓްގައި ކުޅެން ނިކުމެ މީދޫޓީމުގެ ކުޅުންތެރީންނަށް  އެއްވެސް ގޮތަކަށް ރަގަޅު ކުޅުމެއް ކުޅެވޭގޮތެއް ނުވިއެވެ. ނަތީޖާއަކަށް ވެގެންދިޔައީ 5 ވަނަ ސެޓް ފަސޭހަކަމާއެކު ޓީމް ވޮރިއަސްކާމިޔާބުކުރުމެވެ.

މިމެޗުން މީދޫޓީމް ބަލިވުމުން މީދޫޓީމް މުބާރާތުން ކަޓައިގެންދިޔައިރު މިމެޗުން މޮޅުވި ޓީމްވޮރިއާސްވަނީ މިމުބާރާތުގެ ފައިނަލަށް ދަތުރުކޮށްފައެވެ.

މައުލޫމާތު ލިބިފައިވާގޮތުން މިމުބާރާތުގެ މެޗްތައް ކުރިއަށް ގެންގޮސްފައިވަނީ ޕޮއިންޓް ސިސްޓަމަށް ކުޅޭ މެޗްތަކުން އެންމެ ގިނަ ޕޮއިންޓް ލިބޭ ޓީމް ފައިނަލަށް ހޮވޭގޮތަށެވެ. މިގޮތުން ކުޅުނު ހުރިހާ މެޗަކުން މޮޅުވެގެން މަރަދޫފޭދޫ އައިވީވައި ވަނީ  މިމުބާރާތުގެ ފައިނަލަށް ހޮވިފައެވެ. 

ޗެމްޕިއަންޓީމަކަށް 7000 ރުފިޔާ އަދި ދެވަނަ ޓީމަކަށް 3000 ރުފިޔާ ދިނުމަށް ހަމަޖެހިފައިވާ މިމުބާރާތަކީ ” ދަސަދަން ސްޕޯޓްސް ކްލަބް ” ގެ ފަރާތުން  އިންތިޒާމްކޮށްގެން ބާއްވާ މުބާރާތެކެވެ.