ހުޅުދޫގައި ބޮޑު ޖަމާއަތުގައި މާދަމާ ކުރުމަށް ހަމަޖެހިފައިވާ ފިތުރު އީދު ނަމާދު އިމާމުވެ ކޮށްދެއްވާނީ 2013 ވަނަ އަހަރު އެމްބީސީގެ ޓީވީ މޯލްޑިވްސް އިން ކުރިއަށް ގެންދިޔަ ޤުރުއާން ކިޔެވުމުގެ މުބާރާތް “ދިވެހި ރާއްޖޭގެ އެންމެ އަލިގަދަ ތަރި”އަކަށް ހޮވުނު ސ. މަރަދޫފޭދޫ ލިލީމާގޭ ހުސައިން ޒާހިރު އެވެ.
ބޮޑު ޖަމާއަތުގައި އީދު ނަމާދުކުރުން ބޭއްވުމަށް ހުޅުދޫ އަވަށު އޮފީހުން ހަމަޖައްސަވާފައިވަނީ ހުޅުދޫ ފުޓްބޯޅަ ދަނޑުގައެވެ.
ހުޅުދޫ އަވަށު އޮފީހުން މައުލޫމާތު ދީފައިވާގޮތުގައި ބޮޑު ޖަމާއަތުގައި ނަމާދުކުރަން ފެށޭނީ ހެނދުނު 7.30 ގައި ކަމަށާއި ނަމާދަށް ވަޑައިގަންނަވާއިރު ކޮންމެ ބޭފުޅަކުވެސް މުސައްލާއެއް ހިފައިގެން ވަޑައިގެންނެވުމަށް އެދިވަޑައިގެންފައިވެއެވެ.
މީގެ އިތުރުން ބަލިމީހުންނަށާއި އުމުރުން ދުވަސްވީ މީހުންނަށް ހާއްސަކޮށްގެން ނަމާދު ކުރުމަށް ދަނޑުގައި ގޮނޑިތައް ބެހެއްޓިފައި ހުންނާނެ ކަމަށްވެސް ހުޅުދޫ އަވަށު އޮފީހުން މައުލޫމާތު ދީފައިވެއެވެ.
އީދު ނަމާދަށް ފަހު ބޮޑު ޖަމާއަތުގައި ހެނދުގެ ސައި ފުޓްބޯޅަ ދަނޑުގައި އޮންނާނެކަމަށްވެސް ހުޅުދޫ އަވަށު އޮފީހުން ވަނީ ހާމަކޮށްފައެވެ.
ކައުންސިލުން ބުނީ މޫސުމް ގޯވެ، ސްޓޭޑިއަމްގައި އީދު ނަމާދު ނުކުރޭވޭ ހާލަތަށް ގޮސްފި ނަމަ ހުކުރުކުރާ ހުރިހާ މިސްކިތްތަކެއްގައި އީދު ނަމާދު ކުރާނެ ކަމަށެވެ.
ރަސޫލާ ﷺގެ ސުންނަތާ އެއްގޮތަށް އީދު ނަމާދު ހުސްބިމެއްގައި އެއް ޖަމާއަތެއްގެ ގިނަ ރަށްތަކެއްގައި އަންނަނީ ކުރަމުންނެވެ.
ކޮމެންޓްސް (0)