ކޯވިޑް-19 އިން ރައްކާތެރިވުމަށްޓަކާ ކުރާ މަސައްކަތްތަކުގެ ދަށުން އައްޑުއަތޮޅުގެ މަގުތައްވެސް ޑިސްއިންފެކްޓް ކުރުމުގެ މަސައްކަތް ފަށައިފިއެވެ.
އައްޑުއަތޮޅުގެ މަގުތައް ޑިސްއިންފެކްޓް ކުރުމުގެ މަސައްކަތް ފަށާފައިވަނީ އެމް.އެން.ޑީ.އެފްއާއި، އައްޑޫސިޓީ ކައުންސިލް ގުޅިގެންނެވެ. މި މަސައްކަތުގެ ދަށުން އެމް.އެން.ޑީ.އެފްގެ ފަޔަރ އެންޑް ރެސްކިޔުގެ ފެން ބައުޒަރުތައް ބޭނުންކޮށްގެން އައްޑުއަތޮޅުގެ މަގުތަކަށް ކްލޮރިން ފެން ޖަހައިގެން ސާފުކުރުމަށް ވަނީ ހަމަޖެހިފައެވެ. މިގޮތުން މަގުތައް ސާފުކުރުމުގެ މަސައްކަތް އެންމެ ފުރަތަމަ އައްޑުއަތޮޅުން ފަށާފައިވަނީ ހިތަދޫ ބޮޑުމަގުންނެވެ.
އައްޑޫސިޓީ ކައުންސިލުން ހާމަކޮށްފައިވަނީ އެމް.އެން.ޑީ.އެފްގެ އެހީތެރިކަމާއެކު މިއަދުން ފެށިގެން އެކި ދުވަސްތަކަށް ބަހާލައިގެން، އައްޑޫއޮޅުގެ ރަށްރަށުގެ މަގުތައް ސާފުކުރުމުގެ މަސައްކަތް ކުރަމުންދާނެކަމަށެވެ. އެހެންކަމުން ޢާންމު ސަރަޙައްދުތަކުގައި އައިސް ފޮށި ބަހައްޓައިގެން މަސްވިއްކުމާ، ހުއްދަ ނެތި ކާބޯތަކެތި ވިއްކުން ވަކިގޮތެއް އަންގަންދެން ހުއްޓާލުމަށް އައްޑޫސިޓީ ކައުންސިލުން ވަނީ އަންގާފަައެވެ.
އެމް.އެން.ޑީ.އެފްއާއި ގުޅިގެން އައްޑުއަތޮޅުގެ ރަށްރަށުގެ މަގުތައް ޑިސްއިންފެކްޓް ކުރުމުގެ މަސައްކަތް ފަށާފައިވާއިރު، މާލެ، ވިލިމާލެ އަދި ހުޅުމާލޭގެ މަގުތައްވެސް ޑިސްއިންފެކްޓް ކުރުމުގެ މަސައްކަތް ދަނީ ކުރަމުންނެވެ.
މަސްދަރު : ޕީއެސްއެމް