ޔުއެފާ ނޭޝަންސް ލީގުގެ ގްރޫޕް ދޭއްގައި ފްރާންސާއި އިޓަލީ ބައްދަލުކުރި މެޗު، އިޓަލީން ކާމިޔާބު ކޮށްފިއެވެ. އިޓަލީން މި މެޗު ކާމިޔާބު ކޮށްފައި ވަނީ ފްރާންސުން ލަނޑެއް ޖަހާފައި ވަނިކޮށް ފަހަތުން އަރާ ތިން ލަނޑު ޖަހައިގެން 3 ލަނޑު 1 ލަނޑުންނެވެ.
ރޭ މެޗުގެ ފުރަތަމަ މިނެޓުގައި ލަނޑުޖަހައި ފްރާންސަށް ލީޑު ހޯދައިދިނީ ބާކޯލާއެވެ. އިޓަލީން މެޗުގެ ނަތީޖާ ހަމަހަމަ ކުރީ 30 ވަނަ މިނެޓުގައި ޓޮނާލީ ތަނަވަސް ކޮށްދިން ފުރުސަތެއްގައި ޑިމާކޯ ޖެހި ލަނޑުންނެވެ. ފުރަތަމަ ހާފު ނިމިގެން ދިޔައީ ދެ ޓީމް އެއްވަރު ވެގެންނެވެ.
މެޗުގެ ދެވަނަ ހާފު ފެށިތާ ފަސް މިނެޓްގެ ތެރޭ މަޓެއޯ ރެޓޭގީ ތަނަވަސް ކޮށްދިން ފުރުސަތެއްގައި ފްރަޓޭސީ ވަނީ ލަނޑުޖަހައި އިޓަލީއަށް ލީޑު ނަގައިދީފައެވެ. މެޗުގައި އިޓަލީގެ ތިންވަނަ ލަނޑު 74 ވަނަ މިނެޓުގައި ޖެހީ ރަސްޕަޑޯރީއެވެ.
މިމެޗު އިޓަލީވިލާތުން ކާމިޔާބު ކުރި ނަމަވެސް މެޗު ނިމެން ގާތްވެފައިވަނިކޮށް އެޓީމުގެ އެންމެ ފާހަގަ ކޮށްލެވޭ އެއް ޑިފެންޑާ ކަމުގައިވާ ރިކާޑޯ ކަލަފިއޯރީއަށް އަނިޔާވެގެން ވަނީ ބާލަން ޖެހިފައެވެ. ކަލަފިއޯރީއަށް އަނިޔާވެފައިވަނީ ފަރަންސޭސިވިލާތުގެ އުސްމާން ޑެންބެލޭ އަތުން ބޯޅަ ހޯދަން އުޅުމުގެ ތެރޭގައެވެ.