ދައުލަތުގެ މީޑިއާ ޕީއެސްއެމްގެ މެނޭޖިން ޑިރެކްޓަރުގެ މަގާމަށް ޒީނާ ޒާހިރު އައްޔަން ކުރަން ނިންމައިފިއެވެ.
ޒީނާއަކީ އަކީ ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާޒް ހާސިލްކުރައްވައިފައިވާ ބޭފުޅެކެވެ. ޒީނާ ވަނީ މީގެ ކުރިން ބައެއް މީޑިއާތަކުގައި މަސައްކަތްކުރެއްވުމަށްފަހު މޯލްޑިވްސް ބްރޯޑްކާސްޓިން ކޮމިޝަން (އެމްބީސީ) ގެ މެންބަރުކަން ވެސް ކުރައްވާފައެވެ.
ހޯމަ ދުވަހުގެރޭ މީޑިއާތަކާއިއެކު ބޭއްވި ބައްދަލުވުމުގައި އިންތިހާބީ ރައީސް ޑރ.މުއިއްޒު ވަނީ ޕީއެސްއެމްގެ އެމްޑީއަކަށް އައްޔަންކުރަން ނިންމާފައިވަނީ އަންހެން ބޭފުޅެއްކަމަށް ވިދާޅުވެފައެވެ. ނަމަވެސް އެއިރު ނަންހާމަކޮށްފައެއް ނުވެއެވެ.
މީގެ އިތުރުން ޒީނާ މިހާރު ގެންދަވަނީ “ޒީ ޓައިމްސް” ގެ ނަމުގައި އަމިއްލަ އޮންލައިން މެގަޒިނެއް ހިންގަވަމުންނެވެ.
ޕީއެސްއެމްގެ މިހާރުގެ އެމްޑީ އަލީ ހާލިދެވެ.