ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކިކުރަން އެމްޑީޕީން ހުށަހެޅި ގަރާރު އެޖެންޑާކުރި ޖަލްސާ މިއަދުވެސް ބޭއްވޭގޮތެއްނުވުއެވެ.
އީވާ އާލާސްކަންފުޅާ އުޅުއްވާތީ މަޖިލީހުގެ އިއްޔެގެ ޖަލްސާވެސް ކުރިއަށް ގެންދެވިފައި ނުވެއެވެ. އަދި މިއަދުވެސް އީވާ ވަނީ އާލާސްކަންފުޅާ އުޅުއްވާތީ ސަލާން ފޮނުއްވާފައެވެ.
އިއްޔެގެ ޖަލްސާ ކެންސަލްކުރިކަން އިއުލާނުކުރައްވަމުން އަމީން އާއްމު ފާތިމަތު ނިއުޝާ ވިދާޅުވީ އީވާ އާލާސްކަންފުޅާ އުޅުއްވާކަން މަޖިލީހުގެ އިދާރާއަށް ލިއުމުން އެންގެވީ އިއްޔެ ހެނދުނު ކަމަށެވެ. އޭނާ ވިދާޅުވީ މަޖިލީހުގެ ރައީސް ވަކިކުރަން ހުށަހަޅާ ގަރާރެއްގެ ނޯޓިސް މެމްބަރުންނަށް ފޮނުވުމަށް ފަހު އެ ނޯޓިހުގެ މުއްދަތު ހަމަވެފައިިވާ ނަމަ އެންމެ ފުރަތަމަ އަށް އަންނަ ރަސްމީ ދުވަހު އެ ޖަލްސާ ބާއްވަން ޖެހޭ ކަމަށާއި އެހެންވީމާ މިއަދު ޖަލްސާއަށް ވެސް އެޖެންޑާ ކުރާނީ އެ މައްސަލަ ކަމަށެވެ.
ނިއުޝާއަށް އީވާ ފޮނުއްވި ސިޓީގައި ވިދާޅުވެފައި އޮތީ މަޖިލީހުގެ ގަވައިދުގެ 246 ވަނަ މާއްދާގެ ދަށުން ސަލާމް ފޮނުއްވާ ކަމަށެވެ. މެޑިކަލް ސެޓްފިކެޓާއި ބްލަޑް ރިޕޯޓްތަކާ އެކު ފޮނުއްވި ސިޓީގައި އޭނާ އެދިވަޑައިގެންފައި އޮތީ އެ ލިޔުންތައް މަޖިލީގެ މެޖޯރިޓީ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމާއި މައިނޯރިޓީ ލީޑަރު މެދު ހެންވޭރު ދާއިރާގެ މެމްބަރު އަލީ އާޒިމާ ހިއްސާކޮށްދެއްވުމަށެވެ.
ރައީސް ނަޝީދު މަޖިލީހުގެ ރައީސްކަމުން ވަކިކުރުމަށް އެމަނިކުފާނަށް ނޯޓިސް ފޮނުވާފައިވަނީ 12 އޮކްޓޯބަރުގައެވެ. 49
މެންބަރުންގެ ސޮޔާއެކު، ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވަނީ ވެސް އޮކްޓޯބަރު މަހުގައެވެ.