ހޮނިހިރު ދުވަހު ކުރިއަށް ދިޔަ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ އެތެރޭގެ އިންތިޚާބުގައި ހުޅުދޫ ދާއިރާގެ ރައީސްއަކަށް ސާމިއު އަންވަރު އިންތިޚާބު ވެއްޖެއެވެ.
މި އިންތިޚާބުގައި ސާމިއުއާއި ވާދަކުރެއްވީ މުހައްމަދު ރާމިޒުއެވެ. ރާމިޒުގެ މައްޗަށް ސާމިއު ކުރި ހޯދީ 312 ވޯޓުގެ ބޮޑު ތަފާތަކުންނެވެ.
މިގޮތުން ސާމިއުއަށް 630 ވޯޓު ލިބުނުއިރު ރާމިޒުއަށް ލިބުނީ 318 ވޯޓެވެ. މިދާއިރާގައި ހުޅުދޫމީހުން ވޯޓް ދިނުމަށް އަތޮޅުމަދަރުސާގައި ބެހެއްޓުނު ފޮށިން ސާމިއުއަށް 317 ވޯޓް ލިބުނުއިރު ރާމިޒުއަށް ލިބިފައިވަނީ 109 ވޯޓެވެ.
މިދާއިރާގެ މީހުން ވޯޓް ދެއްވުމަށް މާލޭގައި ބެހެއްޓިފައިހުރި ފޮށިން ސާމިއުއަށް 313 ވޯޓް ލިބުނުއިރު ރާމިޒުއަށް މިފޮށިން ލިބުނީ 209 ވޯޓެވެ.
ހުޅުދޫ ދާއިރާގެ ރައީސްކަމަށް ހޮވުނު ސާމިއުއަކީ ހުޅުދޫގެ ރައްޔިތުންނާ ގާތުން ވޭތުވެދިޔަތަނުގައި އިޚްލާސްތެރި ޚިދުމަތްތަކެއް ހުޅުދުއަށާ އެމްޑީޕީއަށްވެސް ކޮށްދެއްވާފައިވާ ބޭފުޅެއްކަން ފާހަގަކޮށްލަންޖެހެއެވެ.
ރާއްޖޭގެ އެންމެ މެންބަރުން ގިނަ ޕާޓީކަމަށްވާ އެމްޑީޕީގެ އެތެރޭގެ އިންތިޚާބު ކުރިއަށް ގޮސްފައިވަނީ ވަރަށް ވާދަވެރިކޮށް ވަރަށް ފޯރީގައެވެ. އަދި ހުޅުދޫގައި ކުރިއަށްދިޔަ ވޯޓްލުމުގެ ކަންތައްވެސް ކުރިއަށް ގޮސްފައިވަނީ ވަރަށް ފޯރީގައިކަން ފާހަގަކޮށްލަންޖެހެއެވެ.