ނުރައްކާތެރި ކޮރޯނާވައިރަހަށް ފަރުވާދިނުމަށް ޗައިނާގައި 1،000 އެނދުގެ ހޮސްޕިޓަލެއް 8 ދުވަސް ތެރޭގައި އަޅާ ނިންމާލައިފިއެވެ.
ކޮރޯނާވައިރަހަށް ފަރުވާދިނުމަށް ޚާއްޞަކޮށްގެން ޗައިނާއިން ހޮސްޕިޓަލު އަޅަންފެށީ ޖެނުއަރީ 23ވަނަ ދުވަހުއެވެ. ހޮސްޕިޓަލު ނިންމަން ޗައިނާއިން ކަނޑައަޅާފައިވަނީ 7 ދުވަހެވެ. ނަމަވެސް ބޭނުންކުރެވޭ ވަރަށް ހޮސްޕިޓަލު އަޅާ ނިންމާލެވުނީ އިތުރު 1 ދުވަސް މަސައްކަތްކޮށްގެންނެވެ. އެމުއްދަތުގެ ތެރޭގައި ހޮސްޕިޓަލުގެ މަސައްކަތް ނިންމުމަށް ހުއްޓުމެއްނެތި 24 ގަޑިއިރު މަސައްކަތްކޮށްފައިވެއެވެ
ކޮރޯނާވައިރަހަށް ފަރުވާދިނުމަށް ޚާއްޞަކޮށްގެން ޗައިނާއިން އިތުރު ހޮސްޕިޓަލެއް އެޅުމުގެ މަސައްކަތްވެސްވަނީ ފަށައިފައެވެ. 1،300 އެނދުގެ އެހޮސްޕިޓަލު މިމަހުގެ ތޭރަވަނަ ދުވަހުގެ ކުރިން އަޅާ ނިންމާނެކަމަށް ޗައިނާއިންވަނީ ބުނެފައެވެ.
ޗައިނާގެ ވުހާން ސިޓީން އެންމެ ފުރަތަމަ ފެނުނު ކޮރޯނާވައިރަސް މިހާތަނަށް 14،000އަށްވުރެ ގިނަ މީހުންނަށް ޖެހި، 305 މީހުންވަނީ މަރުވެފައެވެ. އެވައިރަސް މިހާރުވަނީ 27 ޤައުމަކަށާއި ސަރަޙައްދަށް ފެތުރިފައެވެ