މީދޫ އަންހެނެއްގެ އަތުން ވޮލެޓް ފޭރިގަތް މައްސަލައެއްގައި ތުހުމަތުކުރެވޭ މީހާ ހައްޔަރުކޮށް ބަންދަށް 07 ދުވަސް މީދޫ ކޯޓުން ޖަހައިދީފި އެވެ.
މިދިޔަ ބުރާސްފަތިދުވަހުގެރޭ މޫނު ނިވާކޮށްގެން ހުރި މީހަކު މީދޫ ނޫރާނީވާދީ ކައިރިން ހިގާފައިދިޔަ އަންހެނެއްގެ އަތުން ވޮލެޓް ފޭރުނު މައްސަލައިގައި މީހަކު ހައްޔަރުކުރީ މިމަހުގެ 16 ވަނަ ދުވަހު އެވެ. އޭނާއާ ބެހޭ އިތުރު މައުލޫމާތު ނުދިނަސް، ފުލުހުންގެ ތަރުޖަމާނަކު ވަނީ އެ މީހާގެ ބަންދަށް 07 ދުވަސް ޖަހާފައިވާކަން ރޭ ކަށަވަރުކޮށް ދެއްވާފަ އެވެ.
މައުލޫމާތު ލިބިފައިވާގޮތުގައި އަންހެންމީހާގެ އަތުން ފޭރުނު ވޮލެޓް މީދޫގެ ގެއެއްގެ ގޯތިތެރެއިން ފުލުހުންވަނީ ހޯދާފައެވެ.
އެކަމަކު، ފޭރުނު ވޮލެޓް ފެނުނުއިރު އޭގައިހުރި ތަކެތީގެ ތަފްސީލެއް ލިބިފައެއްނުވެއެވެ.
Advertisement