ކުރީގެ ރައީސް މުހައްމަދު ނަޝީދުގެ މައްޗަށް ޓެރަރިޒަމްގެ ދައުވާކޮށް ޖަލަށް ލާންޖެހުނީ ކުރީގެ ޑިފެންސް މިނިސްޓަރ ޠޮލްހަތު އިބްރާހިމްގެ އިހުމާލުންކަމަށް އޭރު މާލޭ އޭރިޔާގެ ކޮމާންޑަރަކަށް ހުންނެވި މިހާރުގެ ރަށްޔިތުންގެ މަޖިލިހުގެ ހިތަދޫ މެދުދާއިރާގެ މެމްބަރު އިބްރާހިމްދީދީ ވިދާޅުވެއްޖެވެ.
ކުރީގެ ރައީސް މުހައްމަދު ނަޝީދު ވެރިކަމުގައި އޭރު ކްރިމިނަލް ކޯޓްގެ އިސްގާޒީ އަބްދުﷲ މުހައްމަދު ގާނޫނާ ޚިލާފަށް ހައްޔަރުކުރި މައްސަލާގައި ކުރީގެ ރައީސް މުހައްމަދު ނަޝީދުގެ މައްޗަށް ޓެރަރިޒަމްގެ ދައުވާއެއް ސާބިތުވެ 13 އަހަރުގެ ޖަލުހުކުމެއް ކޮށްފައިވާއިރުގައި އެޖަލު ހުކުމް ކުރަންޖެހުނީ ރައީސް ނަޝީދު ކުރެއްވިކަމަކުންކަމަށް ގަބޫލް ނުކުރައްވާކަމަށްވެސް ދީދީ ވިދާޅުވިއެވެ.
އަދި ރައީސް ނަޝީދު އަންގަވައިގެން ކްރިމިނަލްކޯޓްގެ އޭރުގެ އިސްގާޒީ އަބްދުﷲ މުހައްމަދު ހައްޔަރުކުރިކަންއެގޭ އެއްވެސް ލިއުމެއް ނެތްކަމަށވެސްް ދީދީ ވިދާޅުވިއެވެ. އަދި އޭރު އެކަންކޮށްފައިވަނީ އޭރުގެ ޑިފެންސް މިނިސްޓަރ ޠޮލްހަތު އިސްކޮށް ހުންނަވައިގެންކަމަށްވެސް ދީދީ ވިދާޅުވިއެވެ. ދީދީ ވިދާޅުވީ ރައީސް ނަޝީދަށް މިމައްސަލާގައި ނުހައްގުން ގިނައަނިޔާތަކެއް ލިބިފައިވާކަމަށް ގަބޫލްކުރައްވާކަމަށެވެ.
މީގެ އިތުރުން އޭރުގެ ކްރިމިނަލް ކޯޓުގެ އިސްގާޒީ ކަމުގައި ހުންނެވި އަބްދުﷲ މުހައްމަދު ހައްޔަރުކުރުމުގެ ދެތިން ދުވަސްކުރީން ފޮނަދޫދާއިރާގެ މިހާރުގެ މެމްބަރު އަބްދުއްރަހީމް އަބްދުﷲ އޭރުގެ ޑިފެންސް މިނިސްޓަރު ޠޮލްހަތުއާއި ބައްދަލުކުރައްވާފައިވާކަމަށާ އެފަދަ ސުވާލުއުފެދޭ އެތައްކަމެއް ދިމާވެފައިވާކަމަށްވެސް ދީދީ ފާހަގަކުރެއްވިއެވެ.
” އަޅުގަޑުމެންނަށް ފެނިގެންދިޔައީ ޑިފެންސް މިނިސްޓަރަކަށް ނުބައިބޭފުޅަކު ( ނުބައޭ މިދެންނެވީ އެމަގާމުގައި ތެދުވެރިކަމާ ވަފާތެރިކަމާއެކު މަގާމް އަދާނުކުރެވޭ ބޭފުޅަކު ) މަގާމަށް ލީމާވާނެ ހުރިހާ ނުބައެއް ވެގެންދިޔަތަން . އަޅުގަޑު ދެކޭގޮތުގައި ޑިފެންސް މިނިސްޓަރަކަށް ޠޮލްހަތު ހުންނަވައިގެން އެކުރެއްވި ކަމަކީ ވަރަށްވިޔާނުދާކަމެއް . އަޅުގަޑު އެދުވަހުވެސް ދެންނެވިން އެކަން ނުކުރާށޭ ، މިގައު ހަލާކުގެ ތެރެއަށޭ ތިވައްޓާލަނީ . ތިކަން ނުކުރާށޭ . ބުނާއިރަށް އެބޭފުޅާ އަޅުގަޑާ ދިމާއަށް ވިދާޅުވި ގައުމީސަލާމަތަށް ނުރައްކާ ވެއްޖެއޭ . އަޅުގަޑު ދަންނަވަންތޯ ގަައުމީސަލާމަތުގެ ވާހަކަ ޠޮލްހަތު އިބްރާހިމްއަކަށް އަޅުގަޑުކައިރީގައި ނުވެސް ދެއްކޭނެ . އެބޭފުޅާއަކަށް ނުވެސް އެގޭނެ ގައުމީ ސަލާމަތަށް ނުރައްވާވަނީ ކިހިނެއްކަން .”
ދީދީ ވިދާޅުވިއެވެ.