މަސްތުވާތަކެއްޗާއި ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން، ސ. ގަން ޕޮލިސް ސްޓޭޝަނުން ހިންގި އޮޕަރޭޝަނެއްގައި 18 އަހަރުން ދަށުގެ ކުއްޖަކު މަސްތުވާތަކެއްޗާއެކު ހައްޔަރުކޮށްފިއެވެ.
މިކުއްޖާ ހައްޔަރުކޮށްފައިވަނީ މާލޭން ސ. ގަމަށް ދަތުރުކުރާ ފްލައިޓަކުން، ގަމަށް މަސްތުވާތަކެތި އެތެރެކުރާކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާއި ގުޅިގެން، ގަން ޕޮލިސް ސްޓޭޝަނާއި ފުލުހުންގެ އިންޓެލިޖެންސް ގުޅިގެން އޭޕްރީލް 07ވަނަ ދުވަހުގެ ރޭ 1:00 ހާއިރު ހިންގި އޮޕަރޭޝަންގައިއެވެ.
މިކުއްޖާ ހައްޔަރުކޮށް ބަލައިފާސްކުރިއިރު މި ކުއްޖާގެ އަތުން މަސްތުވާތަކެތިކަމަށް ޝައްކުކުރެވޭ އެއްޗެއްހުރި ބޮޑު ދެ ރަބަރު ޕެކެޓް ފެނިފައިވެއެވެ.
މިމައްސަލަ ގަން ޕޮލިސް ސްޓޭޝަނުންދަނީ ތަޙުޤީޤު ކުރަމުންނެވެ.