ދެން ޤައުމީ ޓީމަށް ކުޅުމާ މެދު ގޮތެއް ނިންމޭނީ އެކަމާ ވިސްނުމަށް ފަހު ކަމަށް ޤައުމީ ކެޕްޓަން އަލީ އަޝްފާގް (ދަގަނޑޭ) ބުނެފިއެވެ.
ޤައުމީ ކޯޗާއެކު ޕްރެސް ކޮންފަރެންސްއަށް ނުދިއުމުން، ޓީމުން ވަކިކުރުމާ ގުޅިގެން އަޝްފާގް ބުނީ އެއީ އެކަމަށް އަޅަން ޖެހޭ ފިޔަވަޅު ކަމަށް ޤަބޫލް ނުކުރެވޭ ކަމަށެވެ. އަދި ޕްރެސްއަށް ނުދިއުމުން ކެޕްޓަން ކަމުގެ މަޤާމުން ވަކިކުރުމުގެ ފުރުސަތުވެސް އޮތް ކަމަށެވެ. އަދި ޕްރެސްއަށް ދާން އުނދަގޫ ވާހަކަ ކޯޗާ ޙިއްޞާކޮށްފައިވާނެކަމަށް އާއްމުކޮށްވެސް ޓީވީ އިންޓަރވިއުތަކާ ދުރު ކުޅުންތެރިޔާ ބުންޏެވެ. އަޝްފާޤު ބުނީ ޕްރެސްއަށްދާން އުޒުރުވެރިވުމުން ޓީމުގެ ކެޕްޓަން ކަމުގެ މަޤާމުން ވަކިކުރުމާ ގުޅޭގޮތުން ކޯޗާ މަޝްވަރާވެސް ކޮށްފައިވާނޭކަމަށެވެ.
ޤައުމީ ޓީމުގެ ވައިސް ކެޕްޓަން އައްސަދު އަލީވެސް ވަނީ މިއަދު ކުއްލި ގޮތަކަށް ޤައުމީ ޓީމަށް ކުޅުން ހުއްޓާލިކަން އިއުލާންކޮށްފައެވެ. އައްސަދު ޤައުމީ ޓީމަށް ކުޅުން ހުއްޓާލިކަން އިއުލާން ކުރީ ޓްވީޓަރ މެދުވެރިކޮށެވެ. އެކަމާ ގުޅޭގޮތުން އޭނާގެ ބަހެއް ހޯދުމަށް ގުޅަން ކުރި މަސައްކަތް އޭނާ ފޯނަށް ޖަވާބުނުދޭތީ ކާމިޔާބެއްނުވިއެވެ. އައްސަދު ވަނީ ޤައުމީ ކޯޗާއެކު އެންމެ ފަހުން ބޭއްވި ނޫސްވެރިންގެ ބައްދަލުވުމުގައިވެސް ބައިވެރިވެފައެވެ.