ވެލާނާ އިންޓަރނޭޝަނަލް އެއަރޕޯޓުގެ ވީއައިޕީ ލައުންޖުން ރައްޔިތުންގެ މަޖިލީހުގެ މެންބަރުންނާއެކު ފުރާވަޑައިގަންނަވާ ކޮންމެ މީހަކަށް އެ ޚިދުމަތް ލިބޭގޮތަށް އޮތްއޮތުން ބަދަލުކޮށް، ހަމައެކަނި މެންބަރުންނާއި އެބޭފުޅުން އާއިލާ މެންބަރުންނަށް ވީއައިޕީ ޚިދުމަތް ލިބޭގޮތަށް މަޖިލީހުގެ ޢާންމު ކޮމިޓީން ފާސްކޮށްފިއެވެ.
17 އަދި 18 ވަނަ ރައްޔިތުންގެ މަޖިލީހުން ޢަމަލުކުރަމުން އައިސްފައިވަނީ، މަޖިލިސް މެންބަރުންނާއި، އެބޭފުޅުން އަނބިކަނބަލުން ނުވަތަ ފިރިކަލުންނާއި ދަރީންގެ އިތުރުން މައިންބަފައިންނަށް ވީއައިޕީ ޚިދުމަތް ލިބޭގޮތަށެވެ. ނަމަވެސް ނިމިދިޔަ 19 ވަނަ ރައްޔިތުންގެ މަޖިލީހުން ވަނީ އެ އުސޫލު ބަދަލުކޮށް، މަޖިލީހުގެ މެންބަރުންނާއެކު ފުރާވަޑައިގަންނަވާ އެހެން މީހުންނަށްވެސް ވީއައިޕީ ޚިދުމަތް ލިބޭގޮތަށް ނިންމާފައެވެ.
މިކަމާ ގުޅިގެން މިއަދު ބޭއްވި ޢާންމު ކޮމިޓީން އެންމެ ފުރަތަމަ ނިންމެވީ 19 ވަނަ މަޖިލީހުން ޢަމަލުކުރިގޮތަށް ބޭއްވުމަށެވެ. ނަމަވެސް އޭގެފަހުން މިރޭ ބޭއްވި ކޮމިޓީ ބައްދަލުވުމުގައި ވަނީ ރާއްޖޭގެ އިޤްތިޞާދީ ޙަލަތު މިހާރު ހުރިގޮތުން އަލުން އެ ނިންމެވުން މުރާޖާކުރުމަށް ނިންމާފައެވެ. އެގޮތުން ފޭދޫ ދެކުނު ދައިރާގެ މެންބަރު އިބްރާހީމް ދީދީ ހުށައެޅުއްވީ ވީއައިޕީގެ ޚިދުމަތް މެންބަރުންނާއި އެ މެންބަރުންގެ އާއިލާއަށް ޚިދުމަތްދޭ ގޮތް ހެދުމަށެވެ.
އެ ހުށައެޅުން ކޮމިޓީގެ މެންބަރުންގެ އިއްތިފާޤުން ވަނީ ފާސްކޮށްފައެވެ.
ރައްޔިތުންގެ މަޖިލީހުގެ ޤަވާއިދު އެކުލަވާލުމުގެ މަސައްކަތް ޢާންމު ކޮމިޓިން ދަނީ ކުރިއަށް ގެންދަމުންނެވެ. އަދި އެ މަސައްކަތް މިމަހުގެ ނިޔަލަށް ނިންމުމަށްވެސް ކުރިން ފާސްކޮށްފައިވެއެވެ.