މި މަހުގެ 10 ވާ ބުދަ ދުވަހަކީ، ދިވެހިރާއްޖެއަށް 1445 ވަނަ އަހަރުގެ ފިޠުރު ޢީދު ދުވަސްކަމަށް ކަނޑައަޅައިފިއެވެ.
މިކަން އިއުލާނުކުރައްވާފައިވަނީ، މިއަހަރުގެ ރަމަޟާންމަހުގެ ހަނދާއި ބެހޭގޮތުން ގޮތެއް ނިންމުމަށް ބޭއްވި ރަސްމީ ޖަލްސާގައެވެ.
މިރޭ 8:45 ގައި ބޭއްވި ހަނދު ސާބިތު ކުރުމުގެ ޖަލްސާއަށްފަހު އިއްވި ޤަރާރުގައި ބުނެފައި ވަނީ، މިއަދުގެ އިރުއޮއްސޭ ވަގުތު ރާއްޖޭގެ ހުރިހާ ސަރަހައްދަކަށާއި، އިސްލާމީ ގައުމުތަކަށްވެސް 1445 ވަނަ އަހަރު ޝައްވާލު މަހުގެ ހަނދު ފެންމަތީގައި ހުންނާނެ ކަމަށް އިތުބާރު ހުރި ފަލަކީ ހިސާބުން ކަށަވަރުވާ ކަމަށެވެ.
އެހެންވެ، ހަނދު ސާބިތު ކުރުމުގައި ރާއްޖޭގައި އަމަލުކުރާ އުސޫލުގެ ދަށުން މި އަހަރުގެ ރަމަޟާން މަހުގެ ފަހު ދުވަހަކީ، 30 ރަމަޟާން 1445 ވާ އަންގާރަ ދުވަސްކަމަށް ޤަރާރުގައި ބުނެފައިވެއެވެ.