ގދ. ތިނަދޫ އަކީ ލާމަރުކަޒީ ގާނޫނުގައި ބުނާ ސިޓީއަކަށްވާތީ އެ ތަނަށް ސިޓީ ކައުންސިލެއްގެ ބާރުތައް ދިނުމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީން ނިންމައިފި އެވެ.
ތިނަދޫގައި މިހާރު އޮތް ކައުންސިލަށް ސިޓީ ކައުންސިލަކަށް ލިބިދޭ ބާރުތައް ދިނުމުގައި ހުރި އިދާރީ ގޮންޖެހުންތައް ހައްލު ކޮށްދިނުމަށް އެދި އެ ރަށުގެ ކައުންސިލުން މަޖިލީހަށް ފޮނުވި ސިޓީއަކާ ގުޅިގެން މަޖިލީހުގެ ލާމަރުކަޒީ ކޮމިޓީން ވަނީ އެގޮތަަށް ނިންމާފައެވެ.
ސިޓީއެއްގެ ގޮތުގައި ތިނަދޫ ހިންގަން ގާނޫނީ ގޮތުން ފުށު އަރާ ކަންތައްތަކެއް ހުރި ކަމަށް މިނިސްޓާ އޮފް ސިޓީސް، ލޯކަލް ގަވަރުންމަންޓް އެންޑް ޕަބްލިކް ވާކްސް އާދަމް ޝަރީފް ވިދާޅުވެފައިވެ އެވެ. އެގޮތުން ރަށު ކައުންސިލެއްގެ ގޮތުގައި ތިނަދޫ ކައުންސިލަށް މެންބަރުން ހޮވާ ދައުރުގެ މެދު ތެރެއިން ސިޓީއެއްގެ ދަރަޖަ ދިނުމުން އެ ކައުންސިލް ދެމިއޮންނާނެ ކަމަށް ގާނޫނުގައި އޮންނާތީ ކައުންސިލް ދެމި އޮންނަނީ ރަށު ކައުންސިލެއްގެ ގޮތުގައިތޯ ނޫނީ ސިޓީ ކައުންސިލެއްގެ ގޮތުގައިތޯ މިނިސްޓަރު އާދަމް ޝަރީފް ވަނީ ސުވާލު އުފައްދަވާފަ އެވެ.
ލާމަރުކަޒީ ގާނޫނުގައި ބުނާ ގޮތުން ރަށު ކައުންސިލްގެ ދައުރު ހަމަވުމުގެ ކުރިއަށް، ސިޓީއެއްގެ ދަރަޖަ އެ ކައުންސިލަކަށް ދީފިނަމަ އެއިރު އޮތް ކައުންސިލުގެ ދައުރު ހަމަވަން ދެން ސިޓީ ހިންގާނީ އެެއިރު އިންތިހާބު ކޮށްފައިވާ ރަށު ކައުންސިލަކުންނެވެ.
ގާނޫނުގައި އެ ގޮތަށް ބަޔާން ކުރާތީ، ލާމަރުކަޒީ ކޮމިޓީއަށް ވެސް ފެނުނީ މިހާރު އޮތް ކައުންސިލަކީ ސިޓީ ކައުންސިލެއް ކަމަށް ނިންމުމަށެވެ. އަދި އެ ރަށުގައި ސިޓީ ކައުންސިލްގެ އިދާރާ ގާއިމުކޮށް، ސިޓީ ކައުންސިލަކަށް ލިބިދޭ ހުރިހާ ބާރުތަކެއް ވެސް އެ ރަށުގެ ކައުންސިލަށް ދިނުމަށެވެ.
މިމައްސަލަ ދިރާސާކުރުމަށްފަހު ކޮމިޓީ މެންބަރުންގެ އިއްތިފާގުން ނިންމާފައިވަނީ ލާމަރުކަޒީ ގާނޫނުގެ ތެރެއިން ތިނަދޫއަށް ސިޓީއެއްގެ ދަރަޖަ ދީފައިވާތީ އެއީ ސިޓީއެއް ކަމަށާއި އެތަން މިހާރުން ފެށިގެން ސިޓީ ކައުންސިލެއްގެ ގޮތުގައި ހިންގުމަށެވެ.
ތިނަދޫއަށް ސިޓީއެއްގެ ދަރަޖަ ދިނީ އޮގަސްޓް 31، ގަ އެވެ. އެ ކަން ކުރީގެ ރައީސް އިބްރާހިމް މުހައްމަދު ސޯލިހު އިއުލާން ކުރެއްވީ އެމަނިކުފާނުގެ ރިޔާސީ ކެމްޕެއިންގެ ތެރެއިން ތިނަދޫއަށް ވަޑައިގެން ބޭއްވި ޖަލްސާއެއްގަ އެވެ.