ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މިއަދަށް އެޖެންޑާ ކޮށްފައި ވަނިކޮށް މަޖިލިހުގެ ނައިބު ރައީސް އީވާ މަޖިލިހަށް ސަލާމް ފޮނުއްވާފައިވަނީ ޑެންގޫއަށް ޕޮޒިޓިވް ވެގެންކަމަށް އެގިއްޖެއެވެ.
މައުލޫމާތު ލިބިފައިވާ ގޮތުގައި އީވާ މަޖިލީހަށް ފޮނުއްވި ސިޓީގައި ވިދާޅުވެފައިވަނީ އޭނާ ޑެންގޫ އަށް ޕޮޒިޓިވް ވެފައިވާ ކަމަށެވެ.
އީވާ އާލާސްކަންފުޅާ އުޅުއްވާތީ މަޖިލިހަށް ހާޒިރު ނުވެވޭނެކަން އަންގާފައިވާއިރު، އީވާ ނިސްބަތްވާ ޑިމޮކްރެޓްސް ޕާޓީގެ ޕާލަމެންޓްރީ ގުރޫޕުގެ ބައެއް މެމްބަރުން ވަނީ އީވާ ޑެންގޫއަށް ޕޮޒިޓިވް ވެފައިވާތީ އަވަސް ޝިފާއަށް އެދި ޓުވީޓުވެސް ކޮށްފައެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މަޤާމުން ވަކިކުރުމަށް ހުށައަޅަފައިވާ މައްސަލަ ކުރިއަށް މިއަދު ކުރިޔަށް ނުގެންދެވުމުގެ ސަބަބުން، މާދަމާއަށް އެ މައްސަލަ އެޖެންޑާކުރުމަށް ނިންމާ މިއަދުގެ ޖަލްސާ ވަނީ ނިންމާލާފައެވެ.
މަޖިލީހުގެ މިއަދުގެ ޖަލްސާ ފެއްޓެވުމުގެ ގޮތުން މަޖިލީހުގެ އަމީން އާންމު ފާޠިމަތު ނިއުޝާ ވިދާޅުވީ މަޖިލީހުގެ ރައީސް މަޤާމުން ވަކިކުރުމުގެ މައްސަލައިގެ ނޯޓިސް ފޮނުވުމަށްފަހު ނޯޓިސް ހަމަވުމާއެކު އެންމެ އަވަހަށް އަންނަ ރަސްމީ ދުވަހަށް މައްސަލަ އެޖެންޑާކުރަންޖެހޭކަމަށެވެ. އަދި މަޖިލީހުގެ ޤަވާއިދުގައި މަޖިލީހުގެ ރައީސް މަޤާމުން ވަކިކުރުމުގެ ޖަލްސާގެ ރިޔާސަތު މަޖިލީހުގެ ނާއިބު ރައީސް ބަލަހައްޓަންވާނެކަމަށް ބަޔާންކުރާކަމަށާއި، ނަމަވެސް މަޖިލީހުގެ ނާއިބު ރައީސް އާލާސްކަންފުޅަ އުޅުއްވާކަމަށް ވިދާޅުވެ ސަލާމް ފޮނުއްވާފައިވާކަމަށް ނިއުޝާ ވިދާޅުވިއެވެ.
އެހެންކަމުން މާދަމާގެ ޖަލްސާއަށްވެސް މަޖިލީހުގެ ރައީސް މަޤާމުން ވަކިކުރުމުގެ މައްސަލަ އެޖެންޑާކުރާނެކަމަށް ވިދާޅުވެ ވަނީ ޖަލްސާ ނިންމާލާފައެވެ.
އެމްޑީޕީގެ 49 މެމްބަރަކު ސޮއިކޮށް، ނަޝީދުގެ އިތުބާރު ނެތްކަމަށް ފާސްކުރުމަށް ދެވަނަ ފަހަރަށް މަޖިލިހަށް ޕެޓިޝަން ހުށަހެޅީ މިމަހުގެ 9 ވަނަ ދުވަހުއެވެ. އެމައްސަލާގެ ނޯޓިސް މެމްބަރުންނަށް ފޮނުވާފައިވަނީ މިމަހުގެ 12 ވަނަ ދުވަހުއެވެ.
މިމައްސަލާގައި ޖަވާބުދާރީ ވުމަށް ނަޝީދަށް 30 މިނިޓު އެރުވުމަށް މަޖިލިހުގެ އާންމު ކޮމިޓީން ފާސްކޮށްފައިވަނީ މިމަހުގެ 18 ވަނަ ދުވަހުއެވެ.
އާދީއްތަ ދުވަހަކީ ޢާންމުކޮށް މަޖިލިސް ޖަލްސާ އޮންނަ ދުވަހެއް ނޫނެވެ. ނަމަވެސް މަޖިލީހުގެ ގަވާއިދުގަިއ ބުނަނީ އިތުބާރު ނެތްކަމުގެ ގަރާރުގެ 14 ދުވަހުގެ ނޯޓިސް ހަމަވުމުން ރަސްމީ ބަންދޫން ދުވަހެއްގައި ޖަލްސާ ބާއްވަން ވާނެކަމަށެވެ.
އެމްޑީޕީން ތުހުމަތުކުރަނީ މިއަދުގެ ޖަލްސާއަށް އީވާ ވަޑައިނުގަންނަވަނީ ނަޝީދުގެ އިތުބާރު ނެތްކަމުގެ މައްސަލަ ލަސްކުރުމަށް ކަމަށެވެ. މަޖިލީހުގެ ގަވާއިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ހުށައަޅައި އެމައްސަލަ ކުރިއަށް ގެންދާނަމަ ރިޔާސަތު އިންނަވާނީ މަޖިލީހުގެ ނާއިބު ރައީސްކަމަށެވެ.
މީގެ ކުރިންވެސް މަޖިލީހުގެ ރައީސާއި ނާއިބު ރައީސްގެ އިތުބާރު ނެތްކަމުގެ މައްސަލަ އެމްޑީޕީން މަޖިލީހަށް ހުށައެޅިއެވެ. ނަމަވެސް ރިޔާސީ އިންތިޚާބުގެ ދެވަނަ ބުރާ ދިމާކޮށް، އިތުބާރު އޮތްކަމަށް ބުނެ އެމްޑީޕީން ވަނީ އެ މައްސަލަ އަނބުރާ ގެންގޮސްފައެވެ.
މިފަހަރު ހުށައެޅީ ނަޝީދުގެ އިތުބާރު ނެތްކަމަށް އެކަންޏެވެ. އެ މައްސަލަ ހުށައެޅީ އެމްޑީޕީގެ 49 މެންބަރުން ސޮއިކޮށްފައެވެ.
އެމްޑީޕީން ބުނެފައިވަނީ މިހާރު ހުށަހެޅިފައިވާ، ނަޝީދުގެ އިތުބާރު ނެތްކަމުގެ މައްސަލަ ކުރިޔަސް ނުގެންގޮސް ނަޝީދު ރިޔާސަތުގައި އިންނަވައިގެން އިންތިޚާބީ ނައިބު ރައީސް ހުވާކުރައްވައިފިނަމަ ހުވާގެ ސައްހަކަން ބަލައި ނުގަންނާނޭ ކަމުގައެވެ.
މަސްދަރު: ޚަބަރު އޮންލައިން