އައްޑޫ ސިޓީ ފޭދޫގައި، ފަލަސްތީނަށް އެހީތެރިކަން ފޯރުކޮށްދިނުމުގެ ގޮތުން ކުރިއަށް ގެންދިޔަ މަސްބޭނުމުގެ ހަރަކާތުގައި ބޭނި ކުޑަ ކަންނެލިއެއް އައްޑޫ ޒުވާނަކު 12،000 ރުފިޔާއަށް ގަނެފިއެވެ.
އައްޑޫ ސިޓީ ފޭދޫގައި، ފަލަސްތީނަށް އެހީތެރިކަން ފޯރުކޮށްދިނުމަށް އިއްޔެ ކުރިއަށް ގެންދިޔަ މަސް ވިއްކުމުގެ މި ހަރަކާތަކީ ފޭދޫ “ރެޑް ސެނެޕާ ފިޝިން ލޯންޗް” އިން އިންތިޒާމްކޮށްގެން ކުރިއަށް ގެންދިޔަ ހަރަކާތެކެވެ.
މި ހަރަކާތުގައި 50 އަށް ވުރެ ގިނަ ކަންނެލި ބާނާފައިވާއިރު އެއް ކިލޯގެ ކުޑަ ކަންލިއެއް އެ ޓީމްގެ މެންބަރަކު ވަނީ 12،000 ރުފިޔާއަށް ގަނެފައެވެ.
“ރެޑް ސެނެޕާ ފިޝިން ލޯންޗް” އިން ފަލަސްތީނަށް އެހީވުމަށްޓަކައި ފައިސާ ހޯދުމަށް ކުރިއަށް ގެނދިޔަ މަސްބޭނުމުގެ ހަރަކާތުގައި ބޭނި ހުރިހާ މަހެއް ވިކި ހުސްވެފައިވާއިރު މި އިވެންޓް އިންތިޒާމުކުރި ފަރާތުން ބުނީ ހުރިހާ މަހެއް ވިއްކައިގެން ފަލަސްތީނަށް އެހީތެރިވުމުގެ ގޮތުން 30،000 ރުފިޔާ ހޯދާފައިވާ ކަމަށެވެ.
ފަލަސްތީނަށް އެހީވުމަށް ރާއްޖޭގެ އެކި ހިސާބުތަކުގައި ގިނަ ހަރަކާތްތަކެއް ބާއްވަމުން އަންނައިރު، އައްޑޫ ސިޓީގެ ހުރިހާ އަވަށެއްގައިވެސް އަންނަނީ ފަލަސްތީނަށް އެހީވުމަށް ގިނަ ހަރަކާތްތަކެއް ބާއްވަމުންނެވެ. މި ގޮތުން ސަރުކާރު މުއައްސަސާތަކާ ޖަމިއްޔާ ޖަމާއަތްތަކުގެ އިތުރުން ވަކި ފަރުދުން އިސްނަގައިގެން ވެސް ފަންޑްރައިޒް ހަރަކާތްތައް އަންނަނީ ބާއްވަމުންނެވެ.