ހދ.މަކުނުދޫގައި ބާރުގަދަ އެއްޗެއް ގޮވައި ދެ މީހަކު ނިޔާވެފައިވާއިރު އެ މީހުންގެ ހަށިގަނޑުގެ ބައިތައް ވަކިވަކިވެ އެކި ހިސާބަށް ވިއްސައިގެން ގޮސްފައިވާ ކަމަށް މައުލޫމާތު ލިބިއްޖެއެވެ.
މަކުނުދޫގައި މިއަދު ހަވީރު އެއްޗެއް ގޮވީ އެ ރަށު ބަނދަރު މަތީ ހުންނަ މަސް މާރުކޭޓު ސަރަހައްދުގައެވެ.
އެ ރަށުން ވާހަކަ ދެއްކި މީހަކު ބުނި ގޮތުގައި މުޅި މާރުކޭޓުގެ ހުރިހާ ބިއްލޫރިތައް ތަޅައިގެންދިޔައިރު ނިޔާވި މީހުންގެ ހަށިގަނޑުގެ ބައިތައް ވެސް ވަކިވެ އެކި ހިސާބަށް ވަނީ ބުރައިގެން ގޮސްފައެވެ.
އެގޮތުން އެކެއްގެ ނޭފަތް އޮތީ މާ ދުރުގައި ކަމަށް އޭނާ ބުންޏެވެ.
މީގެއިތުރުން އެހެން މީހަކު ބުނީ އޭނާ ވެސް މީހެއްގެ ކަށިކޮޅަކާއި މަސްކޮޅެއް ދުށް ކަމަށާއި އެ ސަރަހައްދުގެ އެކި ހިސާބަށް ހަށިގަނޑުގެ ބައިތައް ބުރައިގެން ގޮސްފައިވާ ކަމަށެވެ.
ބައެއް މީހުން ބުނާ ގޮތުގައި ގޮވީ ގޭސްފުޅިއެކެވެ. ނަމަވެސް އެކަން އަދި ސާފެއް ނުވެއެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ މަކުނުދޫ ގައި ނަރުދަމާ މަސައްކަތް ކުރަމުންދިޔަ ސައިޓުގައި އެއްޗެއް ގޮވާފައިވާ ކަމަށް ފުލުހުންނަށް ރިޕޯޓުކޮށްފައިވާ ކަމަށާއި އެގޮތުން ސީންގައި ފުލުހުން ހަރަކާތްތެރިވަމުންދާ ކަމަށެވެ. އަދި މި ހާދިސާގައި ދެ މީހަކު ނިޔާވެފައިވާ ކަމަށް މައުލޫމާތު ލިބިފައިވާ ކަމަށެވެ.