“ދިވެހިންގެ ބޮޑު އެއްވުން” މިނަމުގައި ހުޅުމީދޫގައި ބާއްވާ ހިގާލުން މިއަދު ހަވީރު އޮންނާނެކަމަށް، މީދޫ އަވަށު އޮފީހާއި ހުޅުދޫ އަވަށު އޮފީހުން ހާމަކޮށްފިއެވެ.
މި އެއްވުމަކީ ފަލަސްޠީނާއެކު ހުޅުމީދޫ ރަށްޔިތުން ތިބިކަން ހާމަކުރުމަށް ބާއްވާ ޚާއްސަ ހަރަކާތަކެވެ. އެހެންކަމުން ވީހާވެސް ގިނަ ބަޔަކު މިހަރަކާތުގައި ބައިވެރިވުމަކީ ދިވެހިންގެ ހިތުގައި ފަލަސްތީނަށް އޮތް ލޯބި ހާމަކޮށްދޭނެކަމަށް މިހަރަކާތް އިންތިޒާމް ކުރާފަރާތުން ވަނީ ހާމަކޮށްފައެވެ.
“ދިވެހިންގެ ބޮޑު އެއްވުން“ މިނަމުގައި މިއަދު ހަވީރު ރާއްޖޭގެ މީހުން އުޅޭ ހުރިހާ ރަށެއްގައިވެސް މިހިގާލުން މިއަދު ބޭއްވުމަށް ހަމަޖެހިފައިވާއިރު މިހިގާލުމުގައި ގިނަ އަދަދެއްގެ ޖަމިޢިއްޔާ ޖަމާޢަތްތަކުން ބައިވެރިވާނެކަން ވަނީ އަންގާފައެވެ.
ހުޅުމީދޫގައި ބާއްވާ މިއެއްވުން ފެށުމަށް ހަމަޖެހިފައިވަނީ މިއަދު ހަތަރެއް ޖަހާއިރު ހުޅުދޫ އޮފީސް ކުރިމަތިންނެވެ.
މިހިގާލުން ހުޅުދޫ އަވަށު އޮފީސް ކުރިމަތިން ފަށައިގެންގޮސް ބަހާއުއްދީންމަގުން ގޮސް ނިންމާލުމަށް ހަމަޖެހިފައިވަނީ މީދޫ ކޯގަންނު ގަބުރުސްތާނުކައިރިއަށެވެ.
ދިވެހީންގެ ބޮޑު އެއްވުން އާއި ބެހޭގޮތުން މައުލޫމާތުދިނުމަށް ބޭއްވި ނޫސްވެރިންގެ ބައްދަލުވުމުގައި އިންޓަނޭޝަނަލް އެއިޑް ކެންޕެއިންގެ ފަރާތުން ވާހަކަދައްކަވަމުން މުޙައްމަދު އަލީ ވިދާޅުވީ، މިއީ ޤައުމީ ކެމްޕެއިނެއްކަމަށެވެ. ފަލަސްޠީނުގައި މިވަގުތު ކާބޯތަކެއްޗާއި ތެޔޮ، އަދި ފެނާއި ކަރަންޓުވެސް ކަނޑާލެވިފައިވާކަމަށާއި، މިވަގުތަކީ އިސްލާމީ އުންމަތުގެ ގޮތުގައި ދިވެހީން ތެދުވަންވީ ވަގުތުކަމަށް އޭނާ ވިދާޅުވިއެވެ.
އިންޓަނޭޝަނަލް އެއިޑް ކެމްޕެއިނާއި، އިސްރާ އެސޯސިއޭޝަނާއި، މިހަރަކާތުގައި މިވަގުތު ބައިވެރިވާ ޖަމްޢިއްޔާ ޖަމާއަތްތަކުގެ ފަރާތުން ވަނީ ދިވެހިރާއްޖޭގެ ހުރިހާ ޖަމްޢިއްޔާ ޖަމާއަތްތަކާއި، ހުރިހާ ސިޔާސީ ޕާޓީތަކާއި، ހުރިހާ ފަންތިއެއްގެ ހުރިހައި ގިންތިއެއްގެ ކުދި ބޮޑު އެންމެހާ ފަރާތްތަކުން މި އެއްވުމުގައި ބައިވެރިވުމަށް އެދިފައެވެ.
އިސްރާ އެސޯސިއޭޝަނުންގެ ފަރާތުން ވާހަކަދައްކަވުން އާއިޝަތު ޝާދިއާ ވިދާޅުވީ، މި އެއްވުމުގައި ހުރިހައި ދިވެހި ކަނބަލުންވެސް އެމީހުންގެ ދަރިން ގޮވައިގެން ބައިވެރިވުމަކީ ވަރަށް ބޮޑު އެދުމެއްކަމަށެވެ. އިންޓަނޭޝަނަލް އެއިޑް ކެމްޕެއިން، އައިއޭސީން ބުނީ ޣައްޒާއަށް އެހީވުމަށް އެ ޖަމުޢިއްޔާއިން ފެށި ކެމްޕެއިނަށް މިހާރު ގާތްގަނޑަކަށް 3 މިލިއަން ދިވެހި ރުފިޔާ ލިބިފައިވާކަމަށެވެ.
މިވަގުތުވެސް 8 މަސްދުވަހަށް ޣައްޒާގެ ރައްޔިތުންނަށް ބޭނުންވާ އެންމެ ޒަރޫރީ ތަކެތި އެއްކުރެވިފައި އެބަހުރިކަމަށާއި، ޣައްޒާގެ ރައްޔިތުންނަށް ބޭނުންވާ އިތުރު އެހީގެ ތަކެތި އެތެރެވެވޭނެ މަގެއް ފެނިއްޖެނަމަ އެހިތެރިވެދެވޭނީ ދިވެހި ރައްޔިތުން މިކަމުގައި ތިބެގެންކަން އިންޓަނޭޝަނަލް އެއިޑް ކެންޕެއިނުން ވަނީ ބުނެފައެވެ.
ފަލަސްޠީނުގެ ރައްޔިތުންނަށް އެހީތެރިވުމުގެ ގޮތުން ދިވެހި މީޑިއާތަކާއި، އައިއޭސީ ގުޅިގެން ޓެލެތޯނެއް ކުރިއަށް ގެންދިޔުމަށްވެސް ވަނީ ނިންމާފައެވެ.
މި ޓެލެތޯން ކުރިއަށްގެންދިއުމަށް ހަމަޖެހިފައިވަނީ މިއަދުން ފެށިގެން މިމަހުގެ 17ވާ އަންގާރަ ދުވަހުގެ ނިޔަލަށެވެ.