އަލްބުރޫޖް ޖަމާޢަތުގެ ބެލުމުގެ ދަށުން އުމްރާއަށް ދިޔަ ދިވެއްސަކު ނިޔާވެއްޖެ އެވެ.
އަލްބުރޫޖް ޖަމާޢަތުން ބުނި ގޮތުގައި އެ ޖަމާއަތުގެ ޙަވާލުގައި މި އަހަރު ރަމަޟާން މަހު ޢުމުރާއަށް ގޮސްހުރި، މުޙައްމަދު ޒަކީ (83 އަހަރު)، ގއ. ކޮލަމާފުށީ/ގަސްދޮށުގެ، ވަނީ 25 އޭޕްރީލް 2023 ވިލޭރޭ މައްކާ ގަޑިން 12 ޖަހާ ކަންހާއިރު ނިޔާވެފަވެއެވެ.
އަލްމަރްޙޫމް މުޙައްމަދު ޒަކީ ނިޔާވެފައިވަނީ މަދީނާ ޒިޔާރަތުގައި 2 ދުވަސް ހޭދަކުރުމަށްފަހު މިދަތުރުގައި އިތުރު ޢުމުރާއެއް ކުރުމަށް މަދީނާގެ މީޤާތު ޛުލް ޚުލައިފާއިން އިޙްރާމް ބަނދެގެން އައިސް މައްކާގެ ހޮޓަލަށް ފޯރިތާ ދާދި ކުޑަ ހިނދުކޮޅެއްގެ ތެރޭގައިކަމަށް އެ ޖަމާއަތުން ބުންޏެވެ.
”މިދަތުރުގައި އެބޭފުޅާއާއެކު މައްޔިތާގެ ޢާއިލާގެ ބޭފުޅުންގެ ތެރެއިން އެބޭފުޅާގެ ހުވަފަތްވި އަނބިކަނބަލުންނާއި 2 ފިރިހެން ދަރީންނާއި އަންހެން ދަރިކަނބަލަކާއި ދެ ދަނބިދަރީން ބައިވެރިވެފައިވޭ” އަލްބުރޫޖް ޖަމާޢަތުން ބުންޏެވެ.
އަލްބުރޫޖް ޖަމާޢަތުން މައުލޫމާތު ހާމަކޮށްފައިވާގޮތުގައި ޖިއްދާގައި ހުންނަ ދިވެހި ކޮންސިއުލޭޓާއި މައްކާގައި ކިޔަވަން ތިބޭ ދިވެހި ދަރިވަރުންގެ އެހީތެރިކަމާއެކު މިހާރު ދަނީ މުޙައްމަދު ޒަކީގެ ޖަނާޒާގެ ކަންކަން ކުރިޔަށް ގެންދިޔުމަށް ސަޢޫދީ ޢަރަބިއްޔާގެ ޢުމުރާ އެޖެންޓާއެކު މަސައްކަތް ކުރަމުންނެވެ.
މިވަގުތު މައްޔިތާ ބޭއްވިފައިވަނީ މައްކާގެ ކިންގް ފައިޞަލް ހޮސްޕިޓަލްގެ މޯރޗަރީގައެވެ. ހޮސްޕިޓަލުން ދޫކުރާ ލިޔުންތައް ލިބުމާއެކު ހިނެވުމަށްޓަކައި މައްކާގެ ޖާމިޢުލް މުހާޖިރީން ހިނަވާގެއަށް ގެންދެވޭނެކަމަށް ވެސް އެ ޖަމާއުން ބުނެފަވެއެވެ.