މީސް މީޑިއާގައި އާއްމުވެފައިވާ އެއް ޖިންސުން ގުުޅުން ހިންގުމުގެ ވީޑިއޯތަކާއި ގުޅިގެން ކޯޓު އަމުރެއްގެ ދަށުން ކުރީގެ ރައީސް މުހައްމަދު ނަޝީދުގެ ކޮއްކޮ އަދި ގާނޫނީ ވަކީލު ނާޒިމް ސައްތާރު ރިސޯޓެއްގައި ހުއްޓާ ހައްޔަރުކޮށްފި އެވެ.
ނާޒިމް ބަންގުލަދޭޝުގެ 25 އަހަރުގެ ޒުވާނެއް ކަމުގައިވާ އެމްޑީ އަލަމްގިރިއާއެކު އެއްޖިންސުން ގުޅުންހިންގި މަންޒަރު ފެންނަ ވީޑިއޯއެއް މީސްމީޑިއާގައި އާންމުވީ ޖޫން މަހުގެ ތެރޭގައެވެ. އެ މައްސަލާގައި ނާޒިމް ހައްޔަރުކޮށްފައިވަނީ، އޭނާ ހައްޔަރުކުރަން ކުރިމިނަން ކޯޓުން އަމުރެއް ދޫކުރިކަމުގެ ޚަބަރު ލިބިގެން މާލެއިން ފިލައިގެން ގޮސް އއ.އަތޮޅުގެ ރިސޯޓެއްގައި ހުއްޓައެވެ.
އޭނާ އެންމެ ފުރަތަމަ ފިލައިގެން ދިޔައީ އެ އަތޮޅުގައި އޮންނަ ނާޒިމްގެ ބޮޑުބޭބެ ކެރެފާ އަބްދުލްޖަލީލުގެ ރިސޯޓަކަށެވެ. އޭގެ ފަހުން އެ ރިސޯޓުން ފިލައިގެން އެ އަތޮޅުގައި ލަަންކާ ކުންފުންޏަކުން ހިންގާ ވެލިގަނޑު ރިސޯޓަށް ގޮސް އެ ރިސޯޓުގައި ހުރި ކޮޓަރި ދޫކޮށް ފިލައިގެން އުޅެނިކޮށް ފުލުހުން އޭނާ ހައްޔަރުކޮށްފައިވެއެވެ.
ނާޒިމް ހައްޔަރުކޮށްފައިވަނީ އެއް ޖިންސުން ގުޅުންހިންގުމުގެ ކުށުގެ ތުހުމަތުވާ މީހުން ހައްޔަރުކުރުން ލަސްވާތީ އާންމުން މީސްމީޑިއާގައި ކަންބޮޑުވުން ފާޅުކޮށް ސަރުކާރަށް ފާޑުކިޔަމުން އަންނަތާ އެތައް ދުވަހެއް ވީ ފަހުން ފިއްތުންތައް ބޮޑުވެގެންނެވެ.
ނާޒިމް ހައްޔަރުކުރުމާއެކު ނަޝީދުވަނީ ޓުވީޓެއް ކުރައްވާފައެވެ. އެ ޓުވީޓުގައި ނަޝީދު ވިދާޅުވީ އެއްޖިންސުން ގުޅުންހިންގުމުގެ ތުހުމަތުގައި އެމަނިކުފާނުގެ ކޮއްކޮ، ރައީސް އިބްރާހީމް މުޙައްމަދު ޞާލިޙުގެ ސަރުކާރުން ހައްޔަރުކޮށްފައިވާ ކަމަށެވެ.