ދުނިޔޭގައި މިހާރު ފެތުރެމުންދާ މަންކީޕޮކްސް ޖެހިފައިވާ ކަމަށް ޝައްކުކުރެވޭ މީހަކު،ރާއްޖެއިން ފެނި އެމީހާ އެކަހެރިކޮށް ބައްޔަށް ޓެސްޓުކުރުމުގެ މަސައްކަތް ކުރަމުންދާކަން ހާމަވެއްޖެވެ.
މައުލޫމާތު ލިބިފައިވާ ގޮތުގައި، ޔޫރަޕުގެ ގައުމަކަށް ނިސްބަތްވާ އެ މީހާ ގައިގާ ބިހިތަކެއް ނަގައިގެން ފުރަތަމަ ދެއްކީ ޓްރީ ޓޮޕް ހޮސްޕިޓަލުގެ އޯޕީޑީއަށެވެ.
ނަމަވެސް ޗިކަންޕޮކްސްއާ ހިލާފަށް ގައިގާ ބޮޑެތި ފޮޅުތަކެއް ނަގައި، ފެންހެނދިފައި ހުރުމުން އެއީ މަންކީޕޮކްސްގެ އަލާމާތްތަކެއް ކަމަށް ޝައްކުކުރެވި، އޭނާ މިހާރު ވަނީ އެ ހޮސްޕިޓަލުގެ އިމަޖެންސީ ރޫމުގައި އެކަހެރިކޮށްފަ އެވެ.
މައުލޫމާތު ލިބިފައިވާ ގޮތުގައި، އޭނާގެ ސާމްޕަލް ވަނީ ނަގައިފަ އެވެ. ނަމަވެސް މަންކީޕޮކްސްކަން އަދި ކަށަވަރެއް ނުވެ އެވެ.
މަންކީޕޮކްސްއަށް ޝައްކުކުރެވޭ މީހަކު އެކަހެރިކޮށް ބައްޔަށް ޓެސްޓް ކުރުމުގެ މަސައްކަތް ކުރަމުންދާކަމަށް އެޗްޕީއޭއިންވެސްވަނީ ހާމަކޮށްފައެވެ. މަންކީޕޮކްސްއަށް ޝައްކުކުރެވޭ މީހަކު އެކަހެރިކޮށްފައި މިވަނީ، ރާއްޖެއަށްވެސް މަންކީޕޮކްސް އައުމުގެ ފުރުސަތު އެބަ އޮތް ކަމަށް އެ އެޖެންސީން ބުނިތާ ހަތަރު ދުވަސް ފަހުންނެވެ.