ޤާނޫނީ އިމުގެ ތެރެއިން މިނިވަންކަމާއެކު ނޫސްވެރިކަން ކުރެވޭނެ ކަމަށާއި ނޫސްވެރިން ބިރުގަންނާކަށް ނުޖެހޭނެކަމަށް ޔޫތު މިނިސްޓަރު އަޙްމަދު މަހްލޫފް ވިދާޅުވެއްޖެއެވެ.
މަހްލޫފް މިރޭ ކުރެއްވި ޓުވީޓެއްގައި މި ދައުރުގައި ނޫހެއް ބަންދުކުރިތޯއާއި, ނޫސްވެރިކަން ކޮށްގެން ހައްޔަރުކުރިތޯ ސުވާލު ކުރައްވައިފައެވެ. އަދި ޓީވީ ސްޓޭޝަނެއް ރޯކޮށްލިތޯއާއި, ފޮޓޯ ނެގުން މަނާކުރިތޯއާއި, ނޫސްވެރިންނަށް ބިރުދައްކައި ހަމަލާދިންތޯ ވެސް ސުވާލު ކުރައްވައިފައެވެ.
މަހްލޫފް ވިދާޅުވީ މި ސަރުކާރުން ގައިމު ވެސް އެކަމެއް ނުކުރާނެ ކަމަށެވެ. އަދި ޤާނޫނީ އިމުގެ ތެރެއިން މިނިވަންކަމާއެކު ނޫސްވެރިކަން ކުރެވޭނެ ކަމަށާއި, ބިރުގަންނާކަށް ނުޖެހޭނެ ކަމަށެވެ.
“ހަމަގަދަޔަށް ލިޔުއްވާ“ މަހްލޫފް ވިދާޅުވިއެވެ.
މަހްލޫފް މިހެން ވިދާޅުވެފައިވަނީ ހެއްކާ ބެހޭ ޤާނޫނުގެ 136 ވަނަ މާއްދާ އިސްލާހުކުރަން ގޮވައިލާ, 158 ނޫސްވެރިއަކު ސޮއިކޮށް, ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ޕެޓިޝަނެއް ހުށަހަޅާފައިވަނިކޮށް ރައީސް އެ ބިލް ތަސްދީޤު ކުރައްވާފައިވާ ދަނޑިވަޅެއްގައެވެ.