އިންޑިއާގެ މަޝްހޫރު ލަވަކިޔުންތެރިޔާ ލަތާ  މަރުވެއްޖެ

އިންޑިއާގެ މަޝްހޫރު ލަވަކިޔުންތެރިޔާ ލަތާ  މަރުވެއްޖެއެވެ.

ލަތާ މަރުވީ، ކޮވިޑް-19 އާއި ނިއުމޯނިއާ ޖެހި މަހެއްހާ ދުވަހު ފަރުވާ ހޯދުމަށް ފަހު ބަލިން ފަސޭހަވި ނަމަވެސް ސިއްހީ އެހެން ބައެއް މައްސަލަތައް ހުރުމާއެކު ފަރުވާ ހޯދަމުން ދަނިކޮށެވެ. އޭނާ މަރުވީ މިއަދު ހެނދުނުގެ ވަގުތެއްގައި، މުމްބާއި ބްރީޗް ކޭންޑީ ހޮސްޕިޓަލުގައެވެ.

ލަތާ މިދިޔަ މަހު ކޮވިޑަށް ޕޮޒިޓިވް ވެ ހާލު ގޯސްވެ، ވެންޓިލޭޓަރުގައި ފަރުވާ ދިނުމަށް ފަހު ވެންޓިލޭޓަރުން ނެގީ މިދިޔަ މަހުގެ 28 ވަނަ ދުވަހުއެވެ.

ރީތި އެތައް ލަވަތަކެއް ކިޔާފައިވާ ލަތާ އަކީ  ހިންދީ، މަރާޓީ، ބެންގާލީ އަދި އެހެން ބައެއް ބަސަތްކުންވެސް ލަވަކިޔާފައިވާ ލަވަކިއުންތެރިއެކެވެ.  

އޭނާ ވަނީ މިހާތަނަށް 1000 އަށް ވުރެ ގިނަ ފިލްމަށް ލަވަ ކިޔައިދީފައެވެ.

ލަތާގެ އަޑުން އެންމެ ފަހުން ލަވައެއް ކިޔައިފައި ވަނީ 2004 ވަނަ އަހަރު ނެރުނު ފިލްމް ވީރުޒާރާއަށެވެ. އޭރު ލަތާގެ އުމުރަކީ 75 އަހަރެވެ.

އިންޑިއާގެ ރައްޔިތުންނަށް ދޭ އެންމެ ޝަރަފްވެރި އިނާމް ބާރަތު ރަތުނާގެ އެވޯޑާއި، ދާދާ ސާހިބް ޕަލްކޭ އެވޯޑާއި، ޕަދްމާ ވިބޫޝަން އެވޯޑާއި ޕަދްމާ ބޫޝަން އެވޯޑުގެ އިތުރުން ފިލްމް ފެއާ އެވޯޑްތައް އޭނާއަށް ލިބިފައި ވެއެވެ. ލަތާ މަރުވި އިރު އުމުރަކީ 92 އަހަރެވެ.