މިދިޔަ ހަފުތާ ތެރޭގައި އައްޑޫސިޓީން 765 މީހުންނަށް ކޮވިޑް-19 ޖެހިފައިވާ ކަމަށް އައްޑޫ އެމެޖެންސީ އޮޕްރޭޝަން ސެންޓަރުގެ ހިސާބުތަކުން ދައްކައިފި އެވެ.
އައްޑޫ އެމެޖެންސީ އޮޕްރޭޝަން ސެންޓަރުން އާއްމުކުރަމުން އަންނަ ތަފާތް ހިސާބުތަކަށް ބަލާއިރު މިމަހުގެ 23 ވަނަ ދުވަހުން އިއްޔެގެ ނިޔަލަށް ހިތަދުން 420 މީހަކާއި، މަރަދުން 53 މީހުން ، މަރަދޫފޭދޫން 42 މީހުން ، ފޭދުން 121 މީހުން ހުޅުދުން 48 މީހުން އަދި މީދުން 61 މީހުން ކޮވިޑަށް ފައްސިވެފައިވެއެވެ. އަދި މީގެ އިތުރަށް ރިސޯޓާއި އެހެނިހެންތަންތަނުން 9 މީހަކު ފައްސިވެފައިވެއެވެ.
އައްޑޫގެ ކޮވިޑްގެ ކޭސްތައް އިތުރުވަމުންދާތީ ކަމާބެހޭ ފަރާތްތަކުން އަންނަނީ މަޝްވަރާތައް ކުރަމުންކަމަށް އައްޑޫސިޓީގެ ޑެޕިއުޓީ މޭޔަރު މުހައްމަދު ޝުއާއު ” މިހާރު ” ނޫހަށް މައުލޫމާތު ދެއްވަމުން ވިދާޅުވެފައިވާކަމަށް މިހާރު ނޫހުން މިއަދު ބުނެފައިވެއެވެ.
އަދި މީގެ އިތުރަށް ކައުންސިލާއި އީއޯސީ އާއި އައްޑޫ އިކްއަޓޯރިއަލް ހޮސްޕިޓަލް (އޭއީއެޗް) އިން އަންނަނީ އެޗްޕީއޭގެ އިރުޝާދާ އެކު އައްޑޫގެ ހާލަތު ވަރަށް ގާތު ބަލަމުންކަމަށްވެސް ޑެޕިއުޓީ މޭޔަރު މުހައްމަދު ޝުއާއު މިހާރު ނޫހަށް މައުލޫމާތު ދެއްވަމުން ވިދާޅުވެފައިވެއެވެ.
އައްޑޫސިޓީގައި ކޮވިޑްޖެހިފައިވާ މީހުންގެ ތެރެއިން ހޮސްޕިޓަލްގައި އެޑްމިޑްކޮށްގެން މިވަގުތު ފަރުވާ ދެމުން އަންނަނީ ދެމީހަކަށެވެ. އަދި އައްޑޫސިޓީން މިހާތަނަށް ކޮވިޑް ބަލީގައި ނިޔާވެފައިވަނީ 15 މީހެކެވެ.