ޗައިނާއިން ރާއްޖެ އަށް އިތުރު ކޮވިޑް ވެކްސިން ހަދިޔާކުރަން ނިންމާފައިވާ ކަމަށް ފޮރިން މިނިސްޓަރު ޝާހިދު ވިދާޅުވެއްޖެ އެވެ.
ރާއްޖޭގެ އޮންލައިން ނޫހަކަށް އެމަނިކުފާނު ދެއްވި އިންޓަވިއުއެއްގައި ވިދާޅުވީ، ޗައިނާއިން ވެކްސިން ފޯރުކޮށްދޭނެ ކަމުގެ ޔަގީންކަން ދެއްވީ ދާދި ފަހުން ރައީސް އިބްރާހިމް މުހައްމަދު ސޯލިހު އާއި،އެ ގައުމުގެ ރައީސް ޝީ ޖިން ޕިން ދާދިފަހުން ފޯނުން ގުޅައި ދެއްކެވި ވާހަކަފުޅުގެ ތެރޭގައި ކަމަށެވެ.
ޗައިނާއިން އިތުރު ހަތަރު ލައްކަ ޑޯޒްގެ ކޮވިޑް ވެކްސިން ހަދިޔާކުރަން ނިންމާފައިވާ ކަމަށް ވެސް މިނިސްޓަރު ޝާހިދު ވިދާޅުވި އެވެ.
މީގެ އިތުރުން ޝާހިދު ވިދާޅުވީ، ވެކްސިން ދޭނެ ކަމުގެ ޔަގީންކަން ޗައިނާ އިން އެރުވި ނަމަވެސް، ވެކްސިން ލިބޭނެ ސީދާ ތާރީހަކާއި ފޯރުކޮށްދޭ ވެކްސިންގެ ބާވަތައް ހާމަކޮށްފައި ނުވާ ކަމަށެވެ.
އެހެންނަމަވެސް ދާދި އަވަހަށް ރާއްޖެއަށް މި ވެކްސިން ޑޯޒްތައް ލިބިގެން ދާނެ ކަމަށް ޝާހިދު ވިދާޅުވި އެވެ.