އައްޑުއަތޮޅުގައި ކޮވިޑް-19 ފެތުރުން ހުއްޓުވުމަށް އެޅިފައިވާ ފިޔަވަޅުތަކާއެކު، ހުޅުމީދޫއާއި ފޭދުއާއި ދެމެދު އެސްޓީއެލްއިން ބާއްވަމުން އައިސްފައިވާ ދަތުރުތައް އެޕްރީލް 29 ވަނަ ދުވަހުން ފެށިގެން މެދު ކަނޑާލާފައިވާތީ ހުޅުމީދޫގެ ރައްޔިތުންނަށް އެކަމުގެ ސަބަބުން ދިމާވެފައިވާ ދަތިތަކަށް ހައްލެއް ހޯދައިދިނުމުގެ ބޭނުމުގައި އައްޑުއަތޮޅު މޮނިޓަރިންގއަށް ގެނެސްފައިވާ މިދަނޑިވަޅުގައި ހަފްތާއަކު ދެދުވަހު ހުޅުމީދޫއާއި ފޭދޫއާއި ދެމެދ ފެރީ ދަތުރު ކުރެވޭނެ އިންތިޒާމު ހަމަޖައްސާފައިވާ ކަމަށް އައްޑޫ އިމަޖެންސީ އޮޕަރޭޝަން ސެންޓަރުން ހާމަކޮށްފިއެވެ.
ހުޅުމީދޫއާއި ފޭދުއާއި ދެމެދު ބާއްވަމުން އައިސްފައިވާ ދަތުރުތައް ހުއްޓާލާފައިވާތީ އައްޑޫގެ ވަކިން އޮންނަ ހުޅުމީދޫގެ ރައްޔިތުންނަށް އެކަމުގެ ސަބަބުން ބޮޑެތި ދަތިތަކެއް ދިމާވަމުންދާތީ ހަފްތާއަކު ދެދުވަހު ގުޅިފައިވާ ރައްތަކަށް ފެރީ ދަތުރު ކުރެވޭނެ އިންތިޒާމު ހަމަޖައްސާފައިވާކަން ހާމަކޮށްފައިވަނީ އައްޑޫ އީއޯސީން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އައްޑޫސިޓީގެ މޭޔަރު ނިޒާރެވެ. މިދަތުރުތައް މިގޮތައް ހަމަޖެއްސިއަސް ދަތުރު ކުރެވޭނީ ޒަރޫރީ ހާލަތުގައި އެސްއެސްޑީން ހުއްދަ ލިބިގެން ކަން އައްޑޫ އެމެޖެންސީ އޮޕަރޭޝަންސް ސެންޓަރުން ހާމަކޮށްފައިވެއެވެ.
ހަފްތާއަކު ދެދުވަހުހުޅުމީދޫއާއި ފޭދޫއާއި ދެމެދު ދަތުރުތައް ބޭއްވުމަށް އައްޑޫ އިމަޖެންސީ އޮޕަރޭޝަން ސެންޓަރުން ނިންމި ކަމުގައި ވިޔަސް މިދަތުރުތައް ފެށޭނެ ދުވަހެއް އެސެންޓަރުން ހާމަކޮށްފައިނުވެއެވެ. އަދި އެސްޓީއެލް ހުޅުމީދޫ އޮފީހުންވެސް މިދަތުރުތައް ފަށާނެ ދުވަހެއް ހާމަކޮށްފައިނުވެއެވެ.