ދިވެހިރާއްޖޭގެ ކުޅިވަރުގެ ދާއިރާއަށް ދިގުމުއްދަކަށް ގިނަ ހިދުމަތްތަކެއް ކޮށްދެއްވަމުންއައި މާދިހު އިސްމާއީލް ކުއްލި ގޮތަކަށް ނިޔާވެއްޖެ އެވެ.
މާދިހު އިސްމާއީލް ނިޔާވީ ރޭގެ ވަގުތެއްގައި އައިޖީއެމްއެޗް ހޮސްޕިޓަލްގައެވެ. ނިޔާވިއިރު އުމުރަކީ 51 އަހަރެވެ.
މާދިހުގެ ޢާއިލާއިން ބައެއް މީޑިއާތަކަށް މައުލޫމާތު ދެއްވާފައިވާ ގޮތުގައި އޭނާ ނިޔާވީ ހޮޑުލެވި، ހޭނެތުމުން އަޖީއެމްއެޗް ހޮސްޕިޓަލަށް ގެންގޮސް ފަރުވާ ދެމުން ދަނިކޮށެެވެ.
މާދިހު އިސްމާއީލް އަކީ ކުރީގެ މަޝްހޫރު ފުޓްބޯޅަ ކުޅުންތެރިޔާ ޝާހު އިސްމާއީލް އާއި އެމްއެންޑީއެފްގެ އިސް ތަރުޖަމާން މޭޖާ އިބްރާހިމްގެ ބޭބެއެވެ.
މާދިހްވަނީ ރާއްޖޭގައި ބައިބަލާ ކުރިއަރާ އެ ކުޅިވަރުގެ ފޯރި އިތުރުކުރުމަށް ގިނަ މަސައްކަތްތަކެއް ކުރެއްވުމުގެ އިތުރުން ފުޓްބޯޅަ ކުލަބުތަކާއި ކްރިކެޓް ކްލަބުތަކަށްވެސް ހިދުމަތް ކުރައްވާފައިވެއެވެ. އަދި އެފްއޭއެމްގެ ބައެއް މަގާމުތަކާއި ކުޅިވަރު އެހެން ބައެއް އެސޯސިއޭޝަންގެ އެކި މަގާމުތައްވެސް އޭނާ ފުރުއްވާފައިވެއެވެ.
ނިޔާވިއިރު މާދިހު ހުންނެވީ ޣިޔާސުއްދީން އިންޓަނޭޝަނަލް ސްކޫލްގެ ސްޕޯޓްސް ކޯޑިނޭޓަރުގެ މަގާމުގައެވެ. އެ ސްކޫލްގެ ޚިދުމަތާ އޭނާ ގުޅިވަޑައިގަތީ 29 ޖެނުއަރީ 2012 ވަނަ ދުވަހުން ފެށިގެންނެވެ.
މާދިހުގެ ޖަނާޒާ އޮތީ މިއަދު ހެނދުނު 9:00 ގައި އާސަހަރާގައެވެ.
މަސްދަރު: ތިލަދުން