މިއަދު ރާއްޖެއަށް ކުރަމުން މިދާ ވިއްސާރައިގައި ބާރުވަޔާއެކު އައި ކޮޅިގަނޑެއްގައި ނ.މަނަދޫގައި ހުންނަ ބޭންކް އޮފް މޯލްޑިވްސް މަނަދޫ ބްރާންޗްގެ އިމާރާތުގެ ފުރާޅުން ބޮޑުބައެއް ވަޔާ އެއްލައިލައިފިއެވެ.
މިއަދު ހެނދު 8:15 ހާއިރު ހިނގި މިހާދިސާގައި ބޭންކްގެ އިމާރާތުގެ ބޮޑުބަޔަކުން ޓިނުތައް ވަޔާ އުކާލުމާއި ގުޅިގެން ސީލިންގގެ ބޮޑުބައެއް ވަނީ ހަލާކުވެފައެވެ.
އަދި އިމާރާތުގެ ތެރެއަށްވެސް ވަނީ ވަރަށް ބޮޑަށް ވާރޭވެހި ބައެއް ތަކެއްޗަށް ގެއްލުން ލިބިފައެވެ.
މުޅި ރާއްޖެއަށް ކުރަމުން މިދާ ގަދަ ވިއްސާރައިގައި މަނަދޫގެ އިތުރުން އުތުރުގެ އެހެން ބައެއް ރަށްތަކަށްވެސް ބޮޑެތި ގެއްލުންތައް ވެފައެވެ. ބައެއް ރަށްރަށުގައި ގޭގޭގެ ފުރާޅު އެއްލައިލުމާއި، ގަސްގަސް ވެއްޓުން ފަދަ ހާދިސާތައް ދަނީ ހިނގަމުންނެވެ.
މޫސުމާ ބެހޭ އިދާރާއިން ބުނީ ކުރިއަށް އޮތް 3 ދުވަހުވެސް ރާއްޖޭގެ މޫސުން ގޯސްވާނެކަމަށެވެ.
މަސްދަރު: ނާރެސް