ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދަށް އަމާޒުކޮށް ރޭ ދިން ހަމަލާއާގުޅޭ ހަތަރު މީހަކު ފާހަގަކުރެވިފައިވާކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ރައީސް ނަޝީދަށް ހަމަލާދިނީ އެ މަނިކުފާނު ދިރިއުޅުއްވާ ގެ ކައިރިން ކާރަށް އަރައިވަޑައިގަންވަނިކޮށް އެއްޗެއް ގޮއްވައިލައިގެން ބުރާސްފަތި ދުވަހުގެރޭ 20:30 ހާއިރުއެވެ.
ފުލުހުން މިހާރު ބާއްވަމުންދާ ނޫސްވެރިންގެ ބައްދަލުވުމުގައި މަޢުލޫމާތު ދެއްވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ އެ ހަމަލާއާއި ގުޅިގެން ޝައްކުކުރެވޭ ބަޔަކު ފާހަގަކުރެވިފައިވާ ކަމަށެވެ.
އެ ގޮތުން މިހާތަނަށް ހަތަރު މީހަކު ފާހަގަކުރެވިފައިވާކަމަށް ވެސް ސީޕީ ވިދާޅުވިއެވެ.
ހަމައެހެންމެ އެ ހަތަރު މީހުންނާ ގުޅޭ ގޮތުން ޕީޖީއާއި މަޝްވަރާކުރެވިފައިވާކަމަށް ވެސް ސީޕީ ވިދާޅުވިއެވެ.