ޗެލްސީއަށް ކުޅެމުންއައި ބްރެޒިލްގެ ފޯވާޑް ވިލިއަން ޗެލްސީ ދޫކޮށް އާސެނަލަށް ބަދަލުވެއްޖެއެވެ.
އުމުރުން 32 އަހަރުގެ ވިލިއަމް އާސެނަލަށް ބަދަލުވީ ޗެލްސީއާއެކު އޭނާ ހަދާފައިވާ އެއްބަސްވުން ހަމަވުމާއެކު ހިލޭ ޓްރާންސްފާއެއްގެ ދަށުންނެވެ. އަދި އޭނާ އާސެނަލްއަށް ބަދަލުވެފައިވަނީ ތިން އަހަރުގެ އެއްބަސްވުމެއްގެ ދަށުންނެވެ.
ތަފާތު މަގާމުތަކަށް ކުޅުމުގެ ހުނަރު ލިބިފައިވާ ވިލިއަމްއަކީ ޗެލްސީގައި މޮޅު ކުޅުމެއް ދައްކަމުން އައިސްފައިވާ ކުޅުންތެރިއެކެވެ. ވިލިއަމް އާސަނަލްއަށް ބަދަލުވުމުން ވިލިއަން އާއެކު އާސެނަލްގެ ފޯވާޑް ލައިން އިތުރަށް ވަރުގަދަ ވެގެންދާނެ ކަމަށް ބެލެވެއެވެ.
ވިލިއަން އާސެނަލަށް ބަދަލުވިއިރު، އޭނާގެ އެއްބަސްވުން އާކުރަން ޗެލްސީން ވަނީ މަސައްކަތް ކޮށްފައެވެ. އެކަމަކު ޗެލްސީއަށް ނޫނެކޭބުނެ ވިލިއަން ޗެލްސީ ދޫކޮށް އާސެނަލްއަށް ބަދަލުވީ އޭނާގަބޫލް ކުރާ ވަރަށްވުރެ ކުރު މުއްދަތެއްގެ އެއްބަސްވުމެއް ޗެލްސީން ހުށަހެޅުމުންނެވެ.
ވިލިއަން ޗެލްސީއާ ގުޅުނީ 2013 ވަނަ އަހަރު ބްރެޒިލްގެ ކޮރިންތިއަންސްއިންނެވެ.
ވިލިއަމް ޗެލްސީއަށް ކުޅުނު 339 މެޗުގައި 63 ލަނޑު ކާމިޔާބު ކޮށްދީފައިވާއިރު ވިލިއަމްވަނީ ޗެލްސީއާއެކު އިނގިރޭސި ޕްރިމިއާ ލީގު ދެ ފަހަރު، އެފްއޭ ކަޕް އެއް ފަހަރު އަދި ލީގު ކަޕް އެއް ފަހަރު ކާމިޔާބު ކޮށްފައެވެ.