ކޮވިޑް-19 ގެ ނުރައްކާ ތިލަދުންމައްޗަށް ފޯރާފައިވާތީ އެ ސަރަހައްދުން 100 މީހުންގެ ގައި ސާމްޕަލް ނަގައި ޓެސްޓްކުރުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ނިންމާފައިވާކަމަށް ކުޅުދުއްފުށީ ރީޖަނަލް ހޮސްޕިޓަލުން ހާމަކޮށްފި އެވެ.
ކުޅުދުއްފުށީ ރީޖަނަލް ހޮސްޕިޓަލުގެ މެނޭޖަރު އަހުމަދު ދާއޫދު ވިދާޅުވީ ކޮވިޑް-19 ގެ ބިރުވެރިކަން ތިލަދުންމައްޗަށް ފެތުރިފައިވާތީ ހއ،ހދ އަތޮޅުން 100 މީހުން ޓެސްޓްކުރުމަށް ހަމަޖެހިފައިވާކަމަށް އެޗްޕީއޭއިން ހާމަކޮށްފައިވާ ކަމަށެވެ.
އިހަވަންދޫ ކާވިޔާ ބޯޓުން ދަތުރުކުރި އުލިގަމު މީހަކު ކޮވިޑް-19 އަށް ޕޮޒިޓިވްވެފައިވާއިރު ށ ނަރުދޫ، އަމާޒު ބޯޓުގެ ކެޕްޓަންވެސް ކޮވިޑް-19 އަށް ޕޮޒިޓިވްވެފައިވާކަމަށް އެޗްޕީއޭއިން ވަނީ އިއުލާންކޮށްފައި އެވެ. މިދެ ބޯޓަކީ ސަރަހައްދުގެ ގިނަ ރަށްތަކަކަށް ޖައްސަމުން ގޮސްފައިވާ ބޯޓުތަކެއްކަމުން ވައިރަސް ފެތުރިދާނެކަމުގެ ބިރުވެރިކަން މިހާރު ވަނީ އިންތިހާއަށް ބޮޑުވެފައި އެވެ.
އަދި ސަރަހައްދުގެ ގިނަ ރަށްތަކެއް ވަނީ މޮނިޓަރިންގ ހާލަތަށް ގެނެސް، ކޮންޓެކްޓް ރޭސިންގގެ މަސައްކަތް ކުރަމުންނެވެ.