ވިލާތުގެ އިއްތިހާދުން ރާއްޖެއަށް ތިންމިލިއަން ޔޫރޯގެ ހިލޭ އެހީ އެއް ވެދެއްވަން ނިންމަވައިފިއެވެ.
މީގެ ތެރެއިން އެއްމިލިއަން ޔޫރޯއަކީ ސިއްހީދާއިރާއަށް ދޭ އެހީއެކެވެ. އަދި ބާކީ ދެމިލިއަން ޔޫރޯއަކީ ރާއްޖޭގެ ފަތުރުވެރިކަމުގެ ސިނާއަތަށް ދޭއެހީއެކެވެ. މިކަން އިއުލާންކޮށްފައިވަނީ ވިލާތުގެ އިއްތިހާދުގެ ރަސްމީ ވެބްސައިޓްގައެވެ.
އެވެބްސައިޓްގައިވާ ނޫސް ބަޔާނެއްގައިވަނީ ކޮވިޑް19 އާއި ގުޅިގެން ރާއްޖެއިން ކުރަމުންދާ މަސައްކަތްތަކަށް ވިލާތުގެ އިއްތިހާދާ އެއިއްތިހާދުގެ މެމްބަރު ގައުމުތަކުން ބަލައިގަންނަކަމަށެވެ. އަދި ރާއްޖޭގައިތިބި ވިލާތުގެ ފަތުރުވެރީން އަނބުރާ އެމީހުންގެ ގައުމުތަކަށް ފޮނުވައި ދިނުމުގައި ރާއްޖެއިން ކޮށްދެއްވި މަސައްކަތްތައް ބަލައިގަންނަކަމަށްވެސް އެބަޔާނުގައި ބުނެފައިވެއެވެ.
ވިލާތުގެ އިއްތިހާދުން ދަނީ އެކިގައުމުތަކުގައި ކޮވިޑް19 އާއި ގުޅިގެން ކުރަމުންދާ މަސައްކަތްތަކަށް އެއްބާރުލުން ދިނުމަށާ ގައުމުތަކަށް މާލީގޮތުން ލިބެމުންދާ ގެއްލުންތައް ކުޑަކުރުމަށް އެހީތެރިކަން ފޯރުކޮށްދެމުންނެވެ.