ކޮންމެހެން ކުރަން ޖެހިއްޖެ ހާލަތެއްގައި މެނުވީ ދިވެހިން އިންޑިޔާގެ ކެރެލާއަށް ދަތުރުނުކުރުމަށް ފޮރިން މިނިސްޓްރީން އިލްތިމާސް ކުރައްވައިފިއެވެ.
ފޮރިން މިނިސްޓްރީން މިކަމަށް އިލްތިމާސް ކުރެއްވީ މިހާރު ފެތުރެމުންދާ ކޮރޯނާ ވައިރަހަށް ކެރެލާ ސްޓޭޓްގެ ތިން މީހަކު ޕޮޒިޓިވް ވުމާ ގުޅިގެން އެސްޓޭޓުން “ސްޓޭޓް އޮފް ކެލިމިޓީ” ނެރެފައިވާތީއެވެ.
ފޮރިން މިނިސްޓްރީން ހާމަކޮށްފައިވަނީ “ސްޓޭޓް އޮފް ކެލިމިޓީ” ދެމިއޮތްހާ ހިނދަކު ކޮންމެހެން ކުރަންޖެހޭ ހާލަތެއްގައި މެނުވީ ދިވެހިން ކެރެލާއަށް ދަތުރުނުކުރުމަށް އިލްތިމާސް ކުރައްވާ ކަމަށެވެ.
ފޮރިން މިނިސްޓްރީން ހާމަކޮށްފައިވާގޮތުން މިވަގުތު އިންޑިޔާގެ އެކި ސްޓޭޓްތަކާއި ޚާއްސަކޮށް ކެރެލާ ސްޓޭޓްގައި ދިރިއުޅޭ އަދި އެޤައުމަށް ޒިޔާރަތްކުރާ ދިވެހިން ފޮރިން މިނިސްޓްރީގައި ނުވަތަ އިންޑިޔާގައި ހުންނަ ދިވެހިރާއްޖޭގެ ހައިކޮމިޝަން ނުވަތަ ތިރުވަނަންތަޕޫރަންގައި ހުންނަ ދިވެހިރާއްޖޭގެ ކޮންސިއުލޭޓް ޖެނެރަލްގައި ރަޖިސްޓްރީ ކުރުމަށްވެސް އިލްތިމާސް ކުރައްވާފައިވެއެވެ.
މީގެ އިތުރުން އިންޑިޔާގެ ކަމާބެހޭ އިދާރާތަކުން ކޮރޯނާ ވައިރަސްއާ ގުޅިގެން ދެމުންދާ އިޝާރާތްތަކަށް ސަމާލުކަން ދީ އެއަށް ޢަމަލުކުރުމަށްވެސް ފޮރިން މިނިސްޓްރީން އެދިވަޑައިގަންނަވައެވެ.