ބާސެލޯނާ އިން ސްޕެނިޝް ކޮޕާ ޑެލްރޭ ފުޓްބޯޅަ މުބާރާތުގެ ކުއާޓާ ފައިނަލުން ފުރުސަތު ހޯދައިފިއެވެ.
ބާސެލޯނާ ކޮޕާޑެލްރޭގެ ކުއާއާޓާފައިނަލުން ފުރުސަތު ހޯދީ ރޭ ލެގަނެޒްއާއި ބައްދަލުކޮށް ކުޅުނުމެޗް 5 ލަނޑު 0 ލަނޑުން ކާމިޔާބުކޮށްގެންނެވެ.
މިމެޗްގައި ބާސެލޯނާއިން ކާމިޔާބުކުރި 5 ލަނޑުގެ ތެރެއިން 2 ލަނޑު މެސީ ކާމިޔާބުކޮށްދީފައިވާއިރު ކްލެމެންޓް ލެންގްލެޓް 1 ލަނޑު ، ގްރީޒްމަން 1 ލަނޑު އަދި އާރްތުލް ވަނީ 1 ލަނޑު ކާމިޔާބުކޮށްދީފައެވެ.
ރޭގެ މެޗް ބާސެލޯނާ ކާމިޔާބުކުރުމާއެކު ރޭގެ މެޗް ވެގެން ގޮސްފައިވަނީ ބާސާ ޖާޒީގައި މެސީ ހޯދި 500 ވަނަ މޮޅެވެ. މިއާއެކު ސްޕެނިޝް ފުޓްބޯޅައިގެ ތާރީހުގައި އެންމެ ގިނަ މެޗު ކާމިޔާބުކުރި ކުޅުންތެރިއާގެ ޝަރަފް މެސީ އަށް ވަނީ ލިބިފައެވެ. މި ލިސްޓުގައި މެސީގެ ފަހަތުން ދެވަނަ ލިބެނީ 482 މެޗު ކާމިޔާބުކޮށްފައިވާ ބާސާގެ ކުރީގެ ކެޕްޓަން ޒަވީ އެވެ. މިލިސްޓުން ތިންވަނަ ލިބެނީ ރެއާލް މެޑްރިޑްގެ ކުރީގެ ކެޕްޓަން ކަސިޔަސް އަށެވެ. ކަސިއަސް ވަނީ ސްޕެނިޝް ލީގުގައި އޭނާ ހޭދަކުރި ދުވަސްތަކުގައި 463 މެޗު ކާމިޔާބުކޮށްފައެވެ.
ބާސާގެ އިތުރުން ރެއާލް މެޑްރިޑް ވެސް ވަނީ ކޮޕާޑެލްރޭގެ ކުއާޓާ ފައިނަލުން ފުރުސަތު ހޯދާފައެވެ. ރެއާލް ކްއާޓާފައިނަލުން ޖާގަ ހޯދީ ރެއާލް ޒަރަގޯޒާއާ ދެކޮޅަށް ކުޅުނު މެޗުން 4 ލަނޑު 0 ލަނޑުން ކާމިޔާބުކޮށްގެންނެވެ.
ސްޕެނިޝް ލީގަށް ބަލާއިރު 43 ޕޮއިންޓާއެކު ބާސެލޯނާ އޮތީ ތާވަލުގެ ދެވަނައިގައެވެ. 46 ޕޮއިންޓާއެކު އެއްވަނައިގައި އޮތީ ރެއާލްމެޑްރިޑް އެވެ.