އެޑިއުކޭޝަން މިނިސްޓްރީގެ ދަށުން ހިންގަމުންދާ ސުކޫލްތަކަށް މެދުނުކެނޑި ކަރަންޓުގެ ހިދުމަތް ފޯރުކޮށްދިނުމަށްޓަކައި ފެނަކަ ކޯޕަރޭޝަން ލިމިޓެޑާއި އެޑިއުކޭޝަން މިނިސްޓްރީއާ ދެމެދު އެއްބަސްވުމެއްގައި ސޮއިކޮށްފިއެވެ.
މިއެއް ބަސްވުމާއިބެހޭގޮތުން ފެނަކައިން ހާމަކޮށްވާގޮތުން އެއްބަސްވުމަކީ އެޑިއުކޭޝަން މިނިސްޓްރީން ކަނޑައަޅާ ތަންތަނަށް ކަރަންޓްގެ ހިދުމަތް މެދުނުކެނޑި ފޯރުކޮށްދިނުމުގެ އިންތިޒާމު ގާއިމްކުރުމާ ގުޅޭގޮތުން ސޮއިކުރި އެއްބަސްވުމެއް ކަމަށެވެ.
މި އެއްބަސްވުމުގައި އެޑިއުކޭޝަން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އާއިޝަތު އަލީއެވެ. ފެނަކަ ކޯޕަރޭޝަންގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު އަހުމަދު ސައީދު މުހައްމަދެވެ.
އެޑިއުކޭޝަން މިނިސްޓްރީން ބުނީ މި އެއްބަސްވުމުގެ ދަށުން އެއް އަހަރު ދުވަހުގެ ތެރޭގައި މިނިސްޓްރީ އިން ކަނޑައަޅާ ތަންތަނަށް ފެނަކައިން ކަރަންޓު ލިބޭނެ ގޮތަކަށް އިންތިޒާމް ހަމަޖައްސައިދޭނެއެވެ.
އޭގެ އިތުރުން ކަރަންޓް ވިއުގާ ގާއިމުކޮށް، ގެންނަންޖެހޭ ބަދަލުތައް ގެނައުމާއި ސުކޫލްތަކުގެ ކަރަންޓުގެ ހާލަތު ބަލައި އެސެސްމަންޓް ރިޕޯޓް މިނިސްޓްރީއަށް ހުށަހެޅުމުގެ އިތުރުން ސުކޫލްތަކުގައި މިނިސްޓްރީން ކަނޑައަޅާ މުވައްޒަފުންނަށް، ކަރަންޓް ހިދުމަތް ފޯރުކޮށްދިނުމުގައި ދިމާވާ ޓެކްނިކަލް އަދި ފަންނީ ތަމްރީނުތައް ދިނުން އަދި ސުކޫލްތަކުގެ ކަރަންޓުގެ ވިއުގައާއި ކަރަންޓާއި ގުޅުންހުރި ހިދުމަތް ފޯރުކޮށްދިނުންވެސް މިއެއްބަސްވުމުގައި ހިމެނެއެވެ.
ކޮމެންޓްސް (0)