ފެނަކަ ކޯޕަރޭޝަން ލިމިޓެޑަށް 7 އަހަރު ފުރުމުގެ މުނާސަބަތުގައި ދިދަ ނެގުމުގެ ޚާއްޞަ ރަސްމިއްޔާތެއް ފެނަކަ ހުރިހާ ބްރާންޗެއްގައި ކުރިޔަށް ގެންގޮސްފިއެވެ.
މި ގޮތުން މިޚާއްޞަ ދިދަ ނެގުމުގެ ރަސްމިއްޔާތު ފެނަކަ ހުޅުމީދޫ ބްރާޗުގައިވެސްވަނީ ކުރިޔަށް ގެންގޮސްފައެވެ.
އިއްޔެ ހެނދު ފެނަކަ ހުޅުމީދޫ ބްރާންޗްގައި ބޭއްވުނު ދިދަ ނެގުމުގެ ރަސްމިއްޔާތަށް ފެނަކަ ހުޅުމީދޫ ބްރާންޗްގެ ހުރިހާ މުވައްޒަފުންނަށް ދައުވަތު ދެވުނުކަމުގައި ވިޔަސް މިރަސްމިއްޔާތުގައި އެބްރާންޗްގެ ބައެއް މުވައްޒަފުން ބައިވެރި ނުވާކަން ފާހަގަކޮށްލަންޖެހެއެވެ.
މި ޚާއްޞަ ދިދަނެގުމުގެ ރަސްމިއްޔާތުގައި ދިދަ ނަންގަވާ ދެއްވީ ހުޅުމީދޫ ބްރާންޗްގައި ވަޒީފާ އަދާކުރާތާ އެންމެ ގިނަ ދުވަސްވެފައިވާ 2 މުވައްޒަފުންކަމުގައިވާ އައިޝަތު މުހައްމަދުއާއި މުހައްމަދު ވަހީދެވެ.
މި ޚާއްޞަ ރަސްމިއްޔާތުގައި ދުވަހާއި ގުޅިގެން ޚާއްޞަ ދުޢާއެއްވެސް ކިޔާފައިވެއެވެ. ދުޢާ ކިޔައިދެއްވީ އަލްގާރީ އަލީ ނަސީރެވެ.
މި ޚާއްޞަ ރަސްމިއްޔާތު ނިމިގެންދިޔައީ ފެނަކައިގެ 7 ވަނަ އަހަރީދުވަހާއި ގުޅުވައިގެން ތައްޔާރުކޮށްފައިވާ ޚާއްސަ ކޭކެއް ފެޅުމުގެ ރަސްމިއްޔާތު ބޭއްވުމަށްފަހުގައެވެ.