ސްކޫލްތަކުގައި ހެނދުނުގެ ނާސްތާ ދޭން ފެށުމުގެ ޕައިލެޓު ޕްރޮގްރާމްގެ ދަށުން ދިރާސީ އާއަހަރު ފެށޭއިރު 25 ސްކޫލްގައި މި ޕްރޮޖެކްޓް ފަށާނެކަމަށް އެޑިއުކޭޝަން މިނިސްޓަރ ޑރ.ޢާއިޝަތު ޢަލީ ވިދާޅުވެއްޖެއެވެ.
ސްކޫލްތަކުގެ ދަރިވަރުންނަށް ހެނދުނުގެ ނާސްތާ ލިބޭނެގޮތް ހެދުމަކީ ސަރުކާރުގެ ފުރަތަމަ 100 ދުވަހު ކުރުމަށް ކަނޑައަޅާފައިވާ ކަންތައްތަކުގެ ތެރޭގައި ހިމެނޭ ކަމެކެވެ.
ސްކޫލްތަކުގައި ހެނދުނުގެ ނާސްތާ ދޭން ފެށުމުގެ ޕައިލެޓު ޕްރޮގްރާމް އަންނަ ދިރާސީ އާއަހަރާއެކު ފެށުމަށް ސަރުކާރުން މަސައްކަތްކުރަމުންދާއިރު މި ޕްރޮގްރާމްގެ ފުރަތަމަ ފެށުމަށް ހަމަޖެހިފައިވަނީ 25 ސްކޫލްގައެވެ. އެއީ ކޮންމެ އަތޮޅަކުން އެއް ސްކޫލާއި މާލެއިން 3 ސްކޫލާއި ހުޅުމާލެއިން އެއް ސްކޫލަކާއި ވިލިމާލެއިން އެއް ސްކޫލްކަމަށް އެޑިއުކޭޝަން މިނިސްޓްރީން ބުނެއެވެ.
މި ޕްރޮގްރާމާ ގުޅޭގޮތުން މީޑިއާއަށް މަޢުލޫމާތުދެއްވަމުން އެޑިއުކޭޝަން މިނިސްޓަރ ޑރ.ޢައިޝަތު ޢަލީ ވިދާޅުވީ، މި ޕްރޮގްރާމް އެކަށީގެންވާ ގޮތެއްގައި ކުރިއަށްގެންދިއުމަށްޓަކައި، ހަވާލުކުރާ ފަރާތްތައް ހޮވާނީ އެ ސްކޫލެއް ހިމެނޭ ރަށަކުން ނުވަތަ އެ ސަރަހައްދަކުން ކަމަށެވެ.
އެޑިއުކޭޝަން މިނިސްޓަރ ޑރ. ޢައިޝަތު ޢަލީ ވިދާޅުވީ މި ޕްރޮގްރާމް ޕައިލެޓް ޕްރޮޖެކްޓެއްގެ ގޮތުގައި ފެށިނަމަވެސް އަމާޒަކީ، މި ޕްރޮގްރާމް ރާއްޖޭގެ ހުރިހާ ސްކޫލެއްގައި އަވަސް މުސްތަޤުބަލެއްގައި ފެށުން ކަމަށެވެ.
ދަރިވަރުންނަށް ހެނދުނުގެ ނާސްތާ ދިނުމަށް ހިންގާ މިޕްރޮގްރާމްގެ ދަށުން ސްކޫލްތަކުގައި ނާސްތާގެ ގޮތުގައި ދިނުމަށް ހަމަޖެހިފައިވަނީ އެޗްޕީއޭއާއި ޔުނިސެފްގެ ޚާއްސަ ޓެކްނިކަލް ޓީމަކުން އެކުލަވާލި މެނޫތަކެއްގައި ހިމެނޭ ކަނާކަމަށް އެޑިއުކޭޝަން މިނިސްޓްރީން ބުނެއެވެ.
ނޫސްވެރިންނަށް މަޢުލޫމާތުދެމުން ޔުނިސެފްގެ ޕްރޮގްރާމް ސްޕެޝަލިސްޓް ޢައިޝަތު ޝަހުލާ އަޙްމަދު ވިދާޅުވީ ދަރިވަރުންނަށް ޚާއްސަ މެނޫތައް އެކުލަވާލީ، ހެނދުނުގެ ނާސްތާއަށް އެންމެ ރަނގަޅު ބާވަތްތައް ދެނެގަތުމަށް މީގެ 2 އަހަރު ކުރިން އެއްކޮށްފައިވާ މަޢުލޫމާތުތަކަކަށް ރިއާޔަތްކުރުމަށްފަހުކަމަށެވެ.
ދަރިވަރުންނަށް ހެނދުނުގެ ނާސްތާ ދިނުމަށް ހިންގާ ޕައިލެޓް ޕްރޮގްރާމްގެ ދަށުން ހެނދުނުގެ ނާސްތާ ދޭ ސްކޫލްތައްކަށް ދިމާވާ ގޮންޖެހުންތައް ބަލާ ދެނެގަނެ އެކަންކަން ޙައްލުކޮށް ހުރިހާ ސްކޫލަށް މިޕްރޮގްރާމް ކުރިއަށް އޮތް 5 އަހަރުތެރޭގައި ފުޅާކުރުމަކީ ސަރުކާރުގެ އަމާޒެކެވެ. މިޕްރޮޖެކްޓް ހިންގުމަށް އަންނަ އަހަރުގެ ބަޖެޓުގައި ވަނީ 50 މިލިއަން ރުފިޔާ ހިމަނާފައެވެ.
ހެނދުގެ ނާސްތާގެ މެނޫ
މެނޫ 1: ރޮށި، ބިސްގަނޑު ކިރު
މެނޫ 2: ރޮށި، ފަތު މަސްހުރި، ކިރު
.މެނޫ 3: ރޮށި، ތަރުކާރީ މަސްހުނި، ކިރު
މެނޫ 4: ރޮށި، ބަރަބޯ މަސްހުނި، ކިރު
މެނޫ 5: ރޮށި، ބަށި މަސްހުނި، ކިރު
މެނޫ 6: ބޭކަޑް ބީންސް، ރޯލް، ކިރު
މެނޫ 7: ބިސް، ސޭންޑްވިޗް، ކިރު
މެނޫ 8: ޓޫނާ، ސޭންޑްވިޗް، ފެން، ކިރު
މެނޫ 9: ޗީޒް ސޭންޑްވިޗް، ކިރު
މެނޫ 10: ޕާން، ޕީނަޓް ބަޓާ، ކިރު
ހެނދުނުގެ ނާސްތާ ފުރަތަމަ ފަށާ 25 ސްކޫލް:
ޝަހީދު އަލިތަކުރުފާނު ސްކޫލް، ހއ. ތަކަންދޫ
ނޭކުރެންދޫ ސްކޫލް، ހދ. ނޭކުރެންދޫ
މިލަންދޫ ސްކޫލް، ށ. މިލަންދޫ
މާފަރު ސްކޫލް، ނ. މާފަރު
ރަސްމާދޫ ސްކޫލް، ރ. ރަސްމާދޫ
ބ އަތޮޅު އެޑިއުކޭޝަން ސެންޓަރު، ބ. އޭދަފުށި
ޅ އަތޮޅު މަދަރުސާ، ޅ. ކުރެންދޫ
ކ އަތޮޅު އެޑިއުކޭޝަން ސެންޓަރު، ކ. ތުލުސްދޫ
ވ އަތޮޅު މަަދަރުސާ، ވ. ފުލިދޫ
މާޅޮހު ސްކޫލް، އއ. މާޅޮސް
އދ އަތޮޅު މަދަރުސާ، އދ. މާމިގިލި
ދ އަތޮޅު މަދަރުސާ، ދ. މީދޫ
ފ އަތޮޅު ތައުލީމީ މަރުކަޒު، ފ. ނިލަންދޫ
ނާލާފުށީ ސްކޫލް، މ. ނާލާފުށި
ބުރުނީ ސްކޫލް، ތ. ބުރުނީ
ލ އަތޮޅު މަދަރުސާ، ލ. މާބައިދޫ
ދާންދޫ ސްކޫލް، ގއ. ދާންދޫ
ގދ އަތޮޅު ތައުލީމީ މަރުކަޒު، ގދ. ތިނަދޫ
ޏ އަތޮޅު ތައުލީމީ މަރުކަޒު، ފުވައްމުލަކު ސިޓީ
ޝަރަފުއްދީން ސްކޫލް، އައްޑޫ ސިޓީ (ހިތަދޫ)
އަމީނިއްޔާ ސްކޫލް، މާލޭ ސިޓީ
އިސްކަންދަރު ސްކޫލް، މާލޭ ސިޓީ
މަޖީދިއްޔާ ސްކޫލް، މާލޭ ސިޓީ
މުހީއްދީން ސްކޫލް، މާލޭ ސިޓީ (ވިލިމާލެ)
ހުރަވީ ސްކޫލް، މާލޭ ސިޓީ (ހުޅުމާލެ
މަސްދަރު: ޕީއެސްއެމް