ހިތުގެ ބަލިތަކާއި، ފުއްޕާމޭގެ ބަލިތަކަށް ޚާއްސަ މެޑިކަލް ކޭމްޕެއް އައްޑޫ ސިޓީގައި ބާއްވަން އޭ.ޑީ.ކޭ ހޮސްޕިޓަލުން ނިންމައިފިއެވެ.
ދެދުވަހުގެ މުއްދަތަކަށް ކުރިއަށްގެންދާ މިމެޑިކަލް ކޭމްޕް އޮންނާނީ މިމަހުގެ 13 އާއި 14 ވަނަ ދުވަހު ހިތަދޫ ރީޖަނަލް ހޮސްޕިޓަލުގައެވެ. “އޭޑީކޭ ކަމްސްޓު ސައުތް” މި ނަމުގައި ކުރިއަށްގެންދާ މި މެޑިކަލް ކޭމްޕު މެދުވެރިކޮށް ހިތުގެ ބަލިތަކާއި ފުއްޕާމޭގެ ބަލިތަކަށް ފަރުވާ ހޯދާ ފަރާތްތަކަށް އެކަމަށް ޚާއްސަ ސްޕެޝަލިސްޓު ޑޮކްޓަރުންނަށް ދެއްކުމުގެ ފުރުޞަތު މުޅިން ހިލޭ ލިބިގެންދާނެކަމަށް އޭ.ޑީ.ކޭ ހޮސްޕިޓަލުން މަޢުލޫމާތުދެއެވެ.
އޭ.ޑީ.ކޭ ހޮސްޕިޓަލަކީ ރާއްޖޭގައި މިވަގުތު އޮޕަރޭޓްކުރާ އެންމެ ދުވަސްވީ ޕްރައިވެޓް ހޮސްޕިޓަލް. އޭ.ޑީ.ކޭ. ހޮސްޕިޓަލުން ފޯރުކޮށްދޭ ޞިއްޙީ ޚިދުމަތުގެ ފެންވަރު ރަނގަޅުކޮށް، އިތުރު ޚިދުމަތްތައް ތަޢާރަފް ކުރުމަށް އެ ހޮސްޕިޓަލުން ގިނަ މަސައްކަތްތަކެއް ކުރަމުންދާކަން ފާހަގަކުރެވެއެވެ. އެގޮތުން، ތަފާތު ދާއިރާތަކުން ޚިދުމަތުގެ ފެންވަރު ރަނގަޅު ކުރުމާއި، ސްޕެޝަލިސްޓުންނާއި ސުޕަރ-ސްޕެޝަލިސްޓުންގެ ޚިދުމަތްތައް އެ ހޮސްޕިޓަލުން ފޯރުކޮށްދެއެވެ.