ހުޅުދޫގައި މިހާރު ބާއްވަމުންދާ “މިނިވަންކަޕް ފުޓްސަލް މުބާރާތު”ގެ ފައިނަލަށް ތައްލިހި އާއި ޑީކޭ ދަތުރުކޮށްފި އެވެ. މި ދެ ޓީމަކީވެސް ހުޅުދުއަށް ނިސްބަތްވާ ދެ ޓީމެވެ.
މިނިވަން ކަޕް ސެމީ ފައިނަލްގެ ފުރަތަމަ މެޗްގައި މިރޭ ގައުމާއި ބައްދަލުކުރިމެޗުން ތައްލިހި މޮޅުވެފައިވަނީ 5 – 2 ގެ ނަތީޖާއަކުންނެވެ.
މިމެޗްގެ މޮޅު ކުޅުންތެރިއަކަށް ހޮވިފައިވަނީ ތައްލިހީގެ ޝަމްހާދު ސައީދެވެ.
ސެމީގެ ދެވަނަ މެޗްގައި މިރޭ ރިސޯޓްބޯއިސްއާއި ބައްދަލުކޮށް ޑީކޭ މޮޅުވެފައިވަނީ 7-4 ގެ ނަތީޖާއަކުންނެވެ.
މިމެޗްގެ މޮޅު ކުޅުންތެރިއަކަށް ހޮވިފައިވަނީ ޑީކޭގެ އަބްދުﷲ އިމްރާނެވެ.
ޗެމްޕިއަންޓީމަކަށް 35000ރ ރަނައަޕް ޓީމަކަށް 20000 ރ ގެ ފައިސާގެ އިނާމު ހުށަހެޅިފައިވާ މިމުބާރާތުގައި މީދޫ އެއްޓީމާއި މަރަދޫން އެއްޓީމު އަދި ހިތަދޫ ވެމްކޯއިން އެއްޓީމާއި ހުޅުދުން 6 ޓީމެއް ބައިވެރިވިއެވެ.
މިމުބާރާތުގެ ފައިނަލްމެޗްގެ ކުޅުން އޮންނާނީ މިމަހުގެ 25 ވަނަ ދުވަހުގެރޭ 9:00 ގައެވެ.