އދ ގެ ސަލާމަތީ މަޖިލީހުގެ ގޮނޑި ދިވެހިރާއްޖެއަށް ކާމިޔާބު ނުކުރެވި އެ ގޮނޑި އިންޑޮނޭޝިއާއިން ކާމިޔާބު ކޮށްފިއެވެ.
ސަލާމަތީ މަޖިލީހުގެ ގޮނޑިއަށް ވަރަށް ބޮޑަށް ކެމްޕެއިންކޮށް، އެ ގޮނޑި ލިބޭނެ ކަމުގެ ބޮޑު ޔަގީންކަމެއް ސަރުކާރުގެ އިސްފަރާތްތަކުން ދެމުން ގެންދަނިކޮށް މިރޭ އދ ގެ އާއްމު މަޖިލީހުގައި ގެނި ސިއްރު ވޯޓުން ރާއްޖެއަށް ނާކާމިޔާބީއަކާއި ކުރިމަތިލާން ޖެހުނީ ބޮޑު ތަފާތަކުންނެވެ.
އދ ގެ އާއްމު މަޖިލީހުގައި މިރޭ ނެގި ސިއްރު ވޯޓްގައި ރާއްޖެއަށް ލިބިފައިވަނީ އެންމެ 46 ވޯޓެވެ. އިންޑޮނޭޝިއާ ކުރިއަށް އޮތް ދެ އަހަރަށް ސަލާމަތީ މަޖިލީހުގެ ގޮނޑި ކާމިޔާބު ކޮށްފައިވަނީ 144 ވޯޓް ހޯދައިގެންނެވެ. އދ ގެ އާއްމު މަޖިލީހުގައި ނެގި ސިއްރު ވޯޓްގައި ބައިވެރިވެފައިވަނީ 190 ގައުމުންނެވެ.
ކުރިއަށް އޮތް ދެ އަހަރަށް މި ސަރަހައްދުން ރާއްޖެއާއި ވާދަކޮށް އިންޑޮނޭޝިއާއިން ސަލާމަތީ މަޖިލީހުގެ ގޮނޑި ކާމިޔާބު ކުރި އިރު މިއީ ސަލާމަތީ މަޖިލީހުގެ ގޮނޑި އިންޑޮނޭޝިއާއިން ކާމިޔާބުކުރި ހަތަރު ވަނަ ފަހަރެވެ.
އދ ގެ ސަލާމަތީ މަޖިލިސް އެކުލެވިގެންވަނީ ޖުމްލަ 15 މެމްބަރުންގެ މައްޗަށެވެ. އެއީ ކޮންމެ ދެ އަހަރަކުން އިންތިހާބުކުރާ 10 ޤައުމަކާއި ދާއިމީ ފަސް ޤައުމެކެވެ.