2017 ވަނަ އަހަރުގެ ލޮއުރިއަސް ކުޅިވަރު ޝަޙްސިއްޔަތުގެ މަޤާމް ދުނިޔޭގެ އެއްވަނަ ޓެނިސް ކުޅުންތެރިއާ ރޮޖަރ ފެޑެރަރ ހޯދައިފިއެވެ.
ފެޑެރަރ 2017 ވަނަ އަހަރުގެ ސްޕޯޓްސްމަންގެ މަޤާމް ހޯދާފައި މިވަނީ ޓެނިހުގެ ރަފައެލް ނަދާލް އާއި ފުޓްބޯޅަ ތަރި ކްރިސްޓިއާނޯ ރޮނާލްޑޯ، އިނގިރޭސި ވިލާތުގެ ދުވުންތެރިއާ މޯ ފަރާޙް، އެފް.ވަންގެ ހެމިލްޓަން އަދި ބައިސްކަލް ރޭސް ޖެހުމުން ކުރި ހޯދާފައިވާ ކްރިސް ފްރޫމް އާއި ވާދަކޮށެވެ.
ދުނިޔޭގެ ކުޅިވަރު ކުޅުންތެރިންގެ މެދުގައި ދެވޭ އެންމެ ޝަރަފުވެރި އެއް އެވޯޑް ކަމުގައިވާ ލޮއުރިއަސް ސްޕޯޓްސްމަން އޮފް ދަ އިޔާގެ މަޤާމް ފެޑެރަރ ހޯދާފައިވަނީ ނިމިގެންދިޔަ އަހަރުގެ ވިމްބްލްޑަން ޓެނިސް މުބާރާތާއި، އޮސްޓްރޭލިއަން އޯޕަން ޓެނިސް މުބާރާތް ކާމިޔާބުކޮށްގެންނެވެ. މީގެ އިތުރުން ފެޑެރަރ ވަނީ މިއަހަރުގެ ފުރަތަމަ ގްރޭންޑް ސްލޭމް ކަމުގައިވާ އޮސްޓްރޭލިއަން އޯޕަން ކާމިޔާބުކޮށް ވިހި ގްރޭންޑް ސްލޭމް ކާމިޔާބުކުރި ފުރަތަމަ ކުޅުންތެރިއާގެ ޝަރަފް ހޯދާފައެވެ.
އަދި އުމުރުން 36 އަހަރުގައި ފެޑެރަރ ވަނީ އަލުން ދުނިޔޭގެ އެއްވަނަ ޓެނިސް ކުޅުންތެރިއާގެ މަޤާމްވެސް ހޯދާފައެވެ. މޮނާކޯގައި ރޭ ބޭއްވި ލޮއުރިއަސް ސްޕޯޓްސް އެވޯޑް ޝޯގައި ފެޑެރަރ ވަނީ އަހަރުގެ އެންމެ މޮޅު ކަމްބެކްގެ އެވޯޑްވެސް ހޯދާފައެވެ.
ރޭގެ ހަފްލާގައި އިޓަލީ އަދި ރޯމާގެ ކުރީގެ ތަރި ފްރެންސިސްކޯ ޓޮޓީއަށް ވަނީ އެކްސެޕްޝަނަލް އެޗީވްމަންޓް އެވޯޑްވެސް ދީފައެވެ.