ކުޑަހުވަދޫ އާއި ފުވައްމުލައް ސިޓީގެ މެޗުން މިރޭ ގޯލްޑް ކަޕް ފަށަނީ

ރާއްޖޭގެ ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ 90 ޕްލަސް ގޯލްޑް ކަޕް 2024 މިރޭ ފަށާނެއެވެ.

ގައުމީ ފުޓްބޯޅަ ދަނޑުގައި ކުރިއަށްގެންދަން ހަމަޖެހިފައިވާ މި މުބާރާތް ފެއްޓުމުގެ ގޮތުން، ފުރަތަމަ މެޗުގައި މިރޭ 21:00 ގައި ކުޅޭނީ ދ. ކުޑަހުވަދޫ އާއި ފުވައްމުލަކު ސިޓީ އެވެ.

މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރާއިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މިރެއިން ފެށިގެން އަންނަ ޑިސެމްބަރު މަހުގެ 25 ވަނަ ދުވަހުގެ ނިޔަލަށް ކުރިއަށްދާ މުބާރާތުގައި މީގެ ކުރިން 22 ޓީމެއް ބައިވެރިވި ނަމަވެސް، ފަސް ޓީމެއް ވަނީ ފަހުން މުބާރާތުން ވަކިވެފައެވެ.

މި މުބާރާތް ކުރިއަށްދާނީ އެހެން މުބާރާތްތަކާ ޚިލާފަށް ގުރޫޕް ސްޓޭޖު ދެ ފިޔަވައްސަކަށް ބަހާލައިގެންނެވެ. އެގޮތުން ގުރޫޕް ސްޓޭޖުގެ ފުރަތަމަ ފިޔަވަހީގައި އެންމެ ފުލަށްދާ ޓީމު ކަޓާއިރު، ދެވަނަ ފިޔަވަހީގެ އެންމެ ފުލަށްދާ ޓީމުވެސް މުބާރާތުން ކަޓާނެއެވެ.

ދެން މުބާރާތުގައި އޮންނާނީ ކުއާޓާ ފައިނާލާއި ސެމީ ފައިނަލުގެ އިތުރުން ފައިނަލް މެޗެވެ. މުބާރާތުގައި މެޗުތައް ބަލާލުމަށް ގައުމީ ފުޓްބޯޅަ ދަނޑަށް ވަންނަން ޓިކެޓް ނަގަން ޖެހޭއިރު، ޓިކެޓް އަގުތަކަކީ 30 ރުފިޔާ އާއި، 50 ރުފިޔާ އަދި 100 ރުފިޔާއެވެ.

މުބާރާތުގެ ގުރޫޕް ސްޓޭޖްތަކަށް ބަލާއިރު ގުރޫފް އޭގައި ހިމެނެނީ ފުވައްމުލަކު ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އަދި ހއ. ދިއްދޫ އެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިނެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.

ގޯލްޑް ކަޕް 2024 ގެ މީޑިއާ ޕާޓްނަރަކީ ޕަބްލިކް ސަރވިސް މީޑިއާ (ޕީއެސްއެމް) އެވެ.