އައްޑޫ ގައި ގާއިމުވެ ތިބި އިންޑިއާ ސިފައިން އެނބުރި އިންޑިއާއަށް ފުރައިފި އެވެ.
ޑިފެންސް މިނިސްޓްރީން ބުނީ ކަނޑައެޅި ތާރީހަށް އައްޑޫ ގައި ތިބި އިންޑިއާ ސިފައިން ފުރާފައިވާ ކަމަށެވެ. އަދި ހެލްކޮޕްޓަރު އޮޕަރޭޝަންގައި ދެން ތިބޭނީ އިންޑިއާގެ މަދަނީންގެ 26 މީހެއް ކަމަށް އެ މިނިސްޓްރީން ވަނީ ބުނެފައެވެ.
އަދި ލ. ކައްދޫ އާއި ހދ. ހަނިމާދޫގައި ތިބި އިންޑިއާ ސިފައިން އަންނަ މޭ މަހުގެ 10 ގެ ކުރިން ފޮނުވާލުމުގެ ކަންކަން އޮމާންކަމާއެކު ފުރިހަމަކޮށް ނިންމުމަށް ކުރަންޖެހޭ ކަންކަން ޑިޕްލޮމެޓިކް ހަމަތަކާއި އުސޫލުތަކުގެ ތެރެއިން ސަރުކާރުން ކުރަމުންދާ ކަމަށްވެސް މިނިސްޓްރީން ބުނެ އެވެ.
ރާއްޖޭގައި ތިބި އިންޑިއާ ސިފައިން އަނބުރާ ގައުމަށް ގެންދަން އިންޑިއާ އިން ވަނީ އެއްބަސްވެފަ އެވެ. އެގޮތުން ރާއްޖޭގައި މިހާރު ބޭނުންކުރަމުންދާ އިންޑިއާގެ ތިން އުޅަނދުގެ ތެރެއިން ދެ އުޅަނދެއްގައި ހަރަކާތްތެރިވާ ސިފައިން މި މަހު 10ގެ ކުރިން އަދި އަނެއް ދެ އުޅަނދުގެ ސިފައިން މޭ މަހު 10ވަނަ ދުވެހުގެ ކުރިން އެނބުރި ގައުމަށް ގެންދިޔުމަށް އިންޑިއާއިން ވަނީ އެއްބަސްވެފައެވެ.
ރާއްޖޭގައި ގާއިމްވެތިބި އިންޑިއާ ސިފައިން އަނބުރާ ގައުމަށް ފޮނުވާލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ސަރުކާރުން ހާމަކޮށްފައިވާގޮތުގައި އިންޑިއާއިން ރާއްޖެއަށް ހަދިޔާކޮށްފައިވާ އުޅަނދުތައް އޮޕަރޭޓްކުރުމާއި އެހެނިހެން ކަންކަމުގައި ރާއްޖޭގައި ތިބީ އިންޑިއާގެ 88 ސިފައިންނެވެ.
advertisement