ބޭންކް އޮފް މޯލްޑިވްސް އިން މިދޔަ އަހަރު ފެއްޓެވި އެ ކުންފުނީގެ ކޮމިއުނިޓީ ޕްރޮގްރާމް “އަހަރެންގެ ބޭންކް” ކެމްޕެއިން ކުލަގަދަ ރަސްމިއްޔާތަކާއި އެކު އިއްޔެ ފަށައިފިއެވެ.
ބޭންކް އޮފް މޯލްޑިވްސްގެ ހެޑް އޮފީހުގައި ބޭއްވި ކުލަގަދަ ރަސްމިއްޔާތެއްގައި މި ޕްރޮގްރާމް އިފްތިތާހް ކުރެވިގެންދިޔައީ ދިވެހި ފުލުހުން އިސްވެތިބެ ބޭންކްގެ މުވައްޒަފުންނާ ގުޅިގެން ކުރިއަށް ގެންދިޔަ “ރެޕެލް ޖަމްޕް” ގެ ހަރަކާތްތަކަކާ އެކުގައެވެ.
ބޭންކް އޮފް މޯލްޑިވްސް އިއްޔެ ފެއްޓެވި “އަހަރެންގެ ބޭންކް” ކެމްޕޭންގެ ދަށުން މި ފެބުރުއަރީ މަހުގެ ކޮންމެ ދުވަހަކުވެސް ހާއްޞަ ހަރަކާތެއް ހިންގުމަށް ވަނީ ހަމަޖެހިފައެވެ. މިގޮތުން ރައްޔިތުންނާ ގުޅުންހުރި ތަފާތު 60 އަށްވުރެ ގިނަ ހަރަކާތްތަކެއް މުޅި ރާއްޖޭގައި ހިންގުމަށް ހަމަޖެހިފައިވާކަމަށްވެސް މައުލޫމާތު ލިބިފައެވެ.
ބީއެމްއެލްއިން ކުރިއަށްގެންދާ “އަހަރެންގެ ބޭންކް” ކެމްޕޭނަކީ ދިވެހިންނާއި ދިވެހި މުޖުތަމައުއަށް ބީއެމްއެލް އާ އޮތް ގުޅުން އިތުރަށް ބަދަހި ކުރުމަށް މުޅި ރާއްޖެއަށް އަމާޒުކޮށްގެން ކުރިޔަށް ގެންދާ ކެމްޕޭނެކެވެ.