ފެނަކަ ކުންފުންޏާ ގުޅޭ ގޮތުން ހުށަހެޅިފައިވާ މައްސަލަތަކުގެ ތެރެއިން އެންޓި ކޮރަޕްޝަން ކޮމިޝަން (އޭސީސީ) އިން އަނބުރާ ހޯދަން އަންގާފައިވާ 20 މިލިއަން ރުފިޔާއަކީ 2018ގެ ކުރީގެ މުއާމަލާތްތަކެއްގެ ފައިސާ ކަމަށް އެ ކުންފުނިން ބުނެފި އެވެ.
އޭސީސީން އިއްޔެ ނެރުނު ބަޔާނެއްގައި ބުނީ، ފެނަކައާ ގުޅޭ ގޮތުން އެ ކޮމިޝަނުން 75 މައްސަލައެއް ތަހުގީގު ކުރަމުންދާ ކަމަށެވެ. އަދި އެ މައްސަލަތަކާ ގުޅިގެން 20 މިލިއަން ރުފިޔާ ހޯދަން އަންގާފައިވާނެ ކަމަށްވެސް ބުނެފައިވެ އެވެ. ނަމަވެސް އެއީ ކޮންއިރެއްގެ މުއާމަލާތްތަކެއްގެ ފައިސާއެއް ކަމެއް ނުބުނެ އެވެ.
އެކަން މީޑިއާތަކަށް ސާފުކޮށްދޭން ފެނަކައިން ނެރުނު ނޫސް ބަޔާނެއްގައި ބުނީ، އޭސީސީން ބަލަމުންދާ މައްސަލަތަކުގެ އަދަދު ކަމަށް ބުނެފައި އެވަނީ 2012 ވަނަ އަހަރު އެ ކުންފުނި ވުޖޫދު ކުރެވުނު ދުވަހުން ފެށިގެން މިއަދާ ހަމައަށް ހުރި އަދަދު ކަމަށެވެ.
އަދި ހޯދަން އަންގާފައިވާ 20 މިލިއަން ރުފިޔާއަކީ 2011 ވަނަ އަހަރުން ފެށިގެން 2017 ވަނަ އަހަރުގެ ނިޔަލަށް ކުންފުނިން ހިންގާފައިވާ ޖުމުލަ ހަތަރު މުއާމަލާތަކާ ގުޅިގެން ހޯދަން އަންގާފައިވާ ފައިސާ ކަމަށްވެސް ބުންޏެވެ.
އޭގެ ތެރޭގައި ހިމެނެނީ:
- ސަދަން ޔުޓިލިޓީޒް ލިމިޓެޑްގެ ކުރީގެ ފައިނޭންސް ޑިރެކްޓަރަކު ކިޔަވަން ދިއުމަށް ކުންފުނީގެ އޭރުގެ މެނޭޖިން ޑިރެކްޓަރު، މަގާމުގެ ނުފޫޒު ބޭނުންކޮށްގެން ކުންފުނީގެ ބަޖެޓުން ދޫކޮށްފައިވާ ކަމަށް ބުނެވޭ 240،000.00ރ.
- 2015 ވަނަ އަހަރުގެ ތެރޭގައި އަމިއްލަ ކުންފުންޏަކުން ކޮށްފައިވާ މުއާމަލާތްތަކަކާ ގުޅިގެން، ކުންފުނީގެ ޕްރޮކިއުމަންޓް ޕޮލިސީއާ އެއްގޮތަށް އުނިކުރަންޖެހޭ ޖޫރިމަނާ ފައިސާ އުނި ނުކޮށް އެ ފަރާތަށް ފައިސާ ދައްކާފައިވާތީ، ކުންފުންޏަށް ލިބުނު ގެއްލުމަށްވާ 1 މިލިއަން ރުފިޔާ
- 2016 ވަނަ އަހަރު ކުންފުންޏަށް ބޭނުންވާ ޑޮލަރު ގަތުމަށް އަމިއްލަ ކުންފުންޏަކާ އެކު ކުރެވުނު މުއާމަލާތުގައި ކުންފުންޏަށް ލިބެންޖެހޭ 17.8 މިލިއަން ރުފިޔާ
- 2017 ވަނަ އަހަރު ކުންފުންޏަށް ބޭނުންވާ ބިލިން ސޮފްޓްވެއާ ހޯދުމަށް އަމިއްލަ ކުންފުންޏަކާއެކު ކޮށްފައިވާ މުއާމަލާތްތުގައި ކުންފުންޏަށް ގެއްލިފައިވާ 1.4 މިލިއަން ރުފިޔާ