ގައުމީ ކްލައުޑް ގާއިމްކުރަން ހިލޭ އެހީގެ ގޮތުގައި އެމެރިކާއިން 13 މިލިއަން ރުފިޔާ ދިނުމަށް އެއްބަސްވެ ސޮއި ކޮށްފިއެވެ.
ސަރުކާރުގެ ޑޭޓާ ސެންޓަރުތަކާއި އެހެނިހެން ކްރިޓިކަލް ޑިޖިޓަލް ޕަބްލިކް އިންފްރާސްޓްރަކްޗާތައް ކްލައުޑް ބޭސްޑް ގަވަމެންޓް ޑިޖިޓަލް ސާވިސަސް (ޖީޑީއެސް) ޕްލެޓްފޯމަކަށް ބަދަލުކޮށް ތަރައްގީ ކުރުމަށް އެމެރިކާގެ ޓްރޭޑް އެންޑް ޑިވެލޮޕްމަންޓް އޭޖެންސީ (ޔޫއެސްޓީޑީއޭ) އިން މިނިސްޓްރީ އޮފް އެންވާރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާއެކު ގްރާންޓް އެގްރީމަންޓެއްގައި ސޮއި ކޮށްފައިވަނީ މި އޮގަސްޓު މަހުގެ 28 ވަނަ ދުވަހުއެވެ.
މި އެއްބަސްވުމުގެ ދަށުން މި މަޝްރޫއުއަށް 895،000 ޑޮލަރު ނުވަތަ 13،800،900 ރުފިޔާ ހިލޭ އެހީގެ ގޮތުގައި ދިނުމަށް ވަނީ އެއްބަސްވެފައެވެ.
މި އެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތުގައި ތިމާވެއްޓާއި ބެހޭ ވަޒީރު އާމިނަތު ޝައުނާ ވިދާޅުވީ އައިސީޓީ ދާއިރާ ތަރައްގީކޮށް ރާއްޖޭގެ ރަށްތައް ޑިޖިޓަލީ ކަނެކްޓް ކުރުމަކީ ރާއްޖޭގެ ތަރައްގީއަށްޓަކައި ކޮންމެހެން ކުރަންޖެހިފައިވާ މުހިއްމު މަސައްކަތެއް ކަމަށެވެ.
މި އެއްބަސްވުމުގެ ސަބަބުން ރާއްޖޭގެ ގައުމީ ކްލައުޑު ގާއިމުކޮށް، ރައްކާތެރި، ހަރުދަނާ ޑިޖިޓަލް ޕަބްލިކް އިންފްރާސްޓްރަކްޗާ އަކާއެކު ސަރުކާރުގެ ޑިޖިޓަލް ހިދުމަތް ގާއިމުކުރުމަށް މަގުފަހިވެގެންދާނެ ކަމަށާއި ދުނިޔޭގެ ކްލައުޑްގެ ހިދުމަތް ދޭ ފަރާތްތަކާ މެދުކެނޑުމެއްނެތި ގުޅި، ރާއްޖޭގެ ޑިޖިޓަލް ތަރައްގީގެ މަސައްކަތްތައް ހަލުވިވެގެން ދާނެ ކަމަށް ވެސް ވަޒީރު ވިދާޅުވިއެވެ
މީގެ އިތުރުން ކްލައުޑް ބޭސްޑް ގަވަމެންޓް ޑިޖިޓަލް ސާވިސަސް ޕްލެޓްފޯމެއްގެ ސަބަބުން، ޑޭޓާ މެނޭޖް ކުރުމަށާއި ސެކިއުރިޓީ ބެލެހެއްޓުމަށް ޕަބްލިކް ސެކްޓާގެ ކެޕޭސިޓީ އިތުރުވެ، ހަރަދުތައް ކުޑަވާނެ ކަމަށާއި ކާރިސާތަކުގައި އޮޕަރޭޝަންތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށް މަގުފަހިވާނެ ކަމަށް ވެސް ވިދާޅުވިއެވެ. އަދި ރައްކާތެރި ސަރުކާރުގެ ޓެކްނޮލޮޖީ ސްޓެކެއް ގާއިމުކުރެވޭނެ ކަމަށް ވެސް ވިދާޅުވިއެވެ.
ހަމަމިއާއެކު ކްލައުޑް ކޮމްޕިއުޓިން ސިސްޓަމްތަކާއި އޯޕަން ޑޭޓާ ޕްލެޓްފޯމްތަކާއި އެޕްލިކޭޝަންތައް ބޭނުންކޮށްގެން ޑޭޓާ ޑްރިވަން ޑިސިޝަން މޭކިން އަށް ވެސް މަގުފަހިވެގެންދާނެ ކަމަށް ވަނީ ވިދާޅުވެފައެވެ.
ތިމާވެއްޓާއި ބެހޭ ވުޒާރާ އިން ވިދާޅުވީ މި ހިލޭ އެހީ ސަބަބުން، މި ދާއިރާގެ ކަންކަން މިހާރު ހިނގާ ނުހިނގާ ގޮތް ދިރާސާކޮށް ބަލައި، ގާނޫނުތަކާއި ގަވާއިދުތައް ތަންފީޒު ކުރުމާއި ދާއިރާގެ ޕްރޮކިއުމަންޓުގެ މަސައްކަތްތަކަށް ހުރި ގޮންޖެހުންތައް ދެނެގަނެވޭނެ ކަމަށެވެ. އަދި ޑޭޓާ ކްލެސިފިކޭޝަން އަދި ޑޭޓާ ބޭނުންކުރެވޭނެ ގޮތްތަކުގެ ސްޓޭންޑަޑްތައް އެކުލަވާލެވޭނެ ކަމަށެވެ.
ޑޭޓާ ސެންޓަރާއި ޕްލެޓްފޯމް އާކިޓެކްޗާ ޑިޒައިންތައް ފޯރުކޮށްދީ، ކެޕޭސިޓީ ބިލްޑިން ސްޓްރެޓެޖީއެއް އެކުލަވާލައި، މި ދާއިރާގެ މަޝްރޫއުތަކަށް ފައިނޭންސްކޮށް ތަންފީޒު ކުރުމަށް ބޭނުންވާ ޑޭޓާ އާއި އެނަލިސިސް ތައްޔާރުކުރުމަށް މަގުފަހިވެގެންދާނެ ކަމަށް ވެސް އެ ވުޒާރާ އިން ވިދާޅުވިއެވެ.
އެ ވުޒާރާ އިން އިތުރަށް ވިދާޅުވީ ކްލައުޑް ސާވިސް ފޯރުކޮށްދޭ ފަރާތްތަކާއި އެހެނިހެން ޓެކްނޮލޮޖީ ވިއްކާ ފަރާތްތަކާއި ގުޅިގެން ޕަބްލިކް ޕްރައިވެޓް ޕާޓްނަޝިޕެއްގެ ގޮތުގައި ރާއްޖޭގައި ޕަބްލިކް ސެކްޓާ ކްލައުޑް ބޭނުންކުރަން ފެށުމަށް ބައިނަލްއަގްވާމީ ބެސްޓް ޕްރެކްޓިސްތަކާއި ގުޅޭ ތަމްރީނާއި ތަޖުރިބާ ފޯރުކޮށްދިނުމަށް ކްލައުޑް ސެންޓާ އޮފް އެކްސެލެންސްއެއް ގާއިމްކުރުމަށް މަގުފަހިވެގެންދާނެ ކަމަށެވެ.
މި އެއްބަސްވުމުގައި އެމެރިކާގެ ޓްރޭޑް އެންޑް ޑިވެލޮޕްމަންޓް އޭޖެންސީގެ ފަރާތުން ސޮއިކުރެއްވީ އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ހިޒް އެކްލެންސީ ހިއުގޯ ޔޮންއެވެ. ދިވެހި ސަރުކާރުގެ ފަރާތުން ސޮއިކުރެއްވީ ތިމާވެއްޓާއި ބެހޭ ވަޒީރު އާމިނަތު ޝައުނާއެވެ.
advertisement