ޔޫކްރެއިނަށް އަތްގަދަކޮށްފައިވާ ރަޝިޔާގެ ފައުޖުތަކާ ދެކޮޅަށް އެ ޤައުމުން ފަށާފައިވާ ކައުންޓަރއޮފެންސިވް ނުވަތަ ރައްދު ޙަމަލާގެ ކެމްޕޭނުގެ ދަށުން މިހާތަނަށް ހަތަރު އަވަށެއް މިނިވަން ކުރެވިއްޖެ ކަމުގައި ޔޫކްރެއިނުން ބުނެފިއެވެ. މި ކެމްޕޭންގައި ކުރިއެރުންތަކެއް ހޯދާފައި ވަނީ ޔޫކްރެއިންގެ އިރުދެކުނުގައިވާ ސަރަޙައްދުގައެވެ.
މިއީ، އަސްކަރީ ކެމްޕޭންގެ ދަށުން ކުރިއެރުންތަކެއް ހޯދައި، ސަރަޙައްދުތަކެއް މިނިވަންކޮށްފައިވާ ކަން ޔޫކްރެއިނުން އިޢުލާނުކުރި ފުރަތަމަ ފަހަރެވެ. މިނިވަންކޮށްފައިވާ ހަތަރު އަވަށަކީ އެ ޤައުމުގެ އިރުދެކުނުގައިވާ ޑޮނެޓްސްކުގެ ރަށްބޭރުގައިވާ ހަތަރު އަވަށެވެ. އެއީ، ބްލަގަދަތްނޭ، ނިސްކޫޗްނައި، މަކަރަވްކާ، އަދި، ސްރޮޜެވޭއެވެ. މީގެ ތެރެއިން މަކަރަވްކާއަކީ ހަނގުރާމައިގެ ކުރީ ސަފާ ފަސް ވަރަކަށް ކިލޯމީޓަރު ކައިރީގައި އޮންނަ ރަށެކެވެ.
މީގެ ތެރެއިން ސްރޮޜެވޭ މިނިވަން ކުރުމަށް ފަހު ޔޫކްރެއިންގެ ދިދަ ނަގާ މަންޒަރު ފެންނަ ވީޑިޔޯއެއް ވަނީ ސޯޝަލް މީޑިޔާގައި ޢާންމުވެފައެވެ. ޔޫކްރެއިންގެ ދިފާޢީ ވުޒާރާއިން ބުނީ އެ އަވަށް މިނިވަން ކުރުމަށް ހަރަކާތްތެރިވެފައި ވަނީ އަސްކަރިއްޔާގެ މެރިން ކޯގެ 35ވަނަ ސެޕެރޭޓް ބްރިގޭޑް ކަމުގައެވެ.
އަސްކަރީ ކެމްޕޭނާ ގުޅޭ މަޢުލޫމާތު މީޑިޔާތަކާ ހިއްސާކުރަން ޔޫކްރެއިނުން ދަނީ ދެކޮޅު ހަދަމުންނެވެ. ސަބަބަކީ، އެ ކެމްޕޭން ހުއްޓުވަން މަސައްކަތް ކުރުމަށް ރަޝިޔާއަށް ދަތި ކުރުމެވެ. ނަމަވެސް، 2014 ވަނަ އަހަރު ރަޝިޔާއިން އަތްގަދަކޮށްފައިވާ ކްރައިމިޔާއަށް އަސްކަރީ ސާމާނު ފޯރުކޮށްދިނުމަށް ބޭނުންކުރާ ބްރިޖަކަށް ޔޫކްރެއިންގެ ސިފައިން ހުރަސްއަޅަން މަސައްކަތް ކުރަމުންދާ ކަމުގައި އެ ޤައުމުގެ އަސްކަރިއްޔާއިން ބުންޏެވެ.
ނަމަވެސް، ރަޝިޔާއިން ބުނަމުން ދަނީ ޔޫކްރެއިންގެ ކެމްޕޭން ފޭލުވަމުންދާ ކަމުގައެވެ. އަދި، ހުޅަނގުގެ ބާރުތަކުން ޔޫކްރެއިނަށް ފޯރުކޮށްދީފައިވާ ޒަމާނީ އަސްކަރީ ޓޭންކުތަކަކަށް ޙަމަލާދީ، އެ ތަކެތި ނައްތައިލާފައިވާނެ ކަމުގައި ރަޝިޔާއިން ބުނެއެވެ. އޭގެ ތެރޭގައި އެމެރިކާއާއި ޖަރުމަނުވިލާތުގައި އުފައްދާފައިވާ ޒަމާނީ ޓޭންކުފަހަރު ހިމެނޭ ކަމުގައި ރަޝިޔާއިން ބުނެއެވެ.
ޔޫކްރެއިންގެ އަސްކަރިއްޔާގެ ތަރުޖަމާނު ސަރްގީ ޗިރިވާތީ ވިދާޅުވީ ޑޮނެޓްސްކުގައިވާ ބަޚްމުތާއި އަވްދީވްކާގެ އިތުރުން ލުހާންސްކް ސަރަޙައްދުގައި އޮންނަ ބިލާގޯރަވްކާގައި ވެސް ދެ ޤައުމުގެ ފައުޖުތަކުގެ މެދުގައި ޙަމަލާތައް ބަދަލުކުރަމުންދާ ކަމުގައެވެ. މަސްރަޙު ދިރާސާކުރާ ފަރާތްތަކުން ބުނީ ޔޫކްރެއިންގެ އަސްކަރީ ކެމްޕޭން ދިފާޢުކުރަން ރަޝިޔާއިން ވަރަށް ބޮޑަށް ތައްޔާރުވެފައިވާ ކަމުގައެވެ. އަދި، ރަޝިޔާއިން އަތްގަދަ ކޮށްފައިވާ ސަރަޙައްދުތައް މިނިވަން ކުރުމަކީ ފަސޭހަ ކަމަކަށް ނުވާނެ ކަމުގައެވެ.
މަސްދަރު : ޕީއެސްއެމް ނިއުސް