ޕީއެސްޖީން ހުއްދަހޯދުމަކާ ނުލައި، ސައުދީ އަރަބިއްޔާއަށް ކުރި ދަތުރުގެ ސަބަބުން، ޕީއެސްޖީން، މެސީ ސަސްޕެންޑުކޮށްފިއެވެ.
މިދިޔަ އަހަރުގެ ވޯލްޑް ކަޕް ފުޓުބޯޅަ މުބާރާތް އާޖެންޓީނާއާއެކު ކާމިޔާބުކުރި މެސީ ސައުދީއަށް ގޮސްފައިވަނީ، ފްރެންޗް ލީގުގައި އާދިއްތަ ދުވަހު ލޮރިއެންޓާ ދެކޮޅަށްކުޅެ ޕީއެސްޖީ ބަލިވި މެޗަށްފަހު ހޯމަ ދުވަހުއެވެ.
ބޭރުގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި ސައުދީއަށް މި ދަތުރު ކުރުމުގެ ކުރިން މެސީ ވަނީ ޕީއެސްޖީގެ މެނޭޖްމަންޓުގެ ކިބައިން ސައުދީއަށް ދަތުރުކުރުމަށްޓަކައި ހުއްދައަށް އެދިފައެވެ. އެހެންނަމަވެސް މި ހުއްދަ މެސީއަށް ދޭން، ޕީއެސްޖީގެ މެނޭޖްމަންޓުން ދެކޮޅު ހަދާފައިވާކަމަށާއި، މެސީ އެ ގައުމަށް ގޮސްފައިވަނީ ކުލަބުގެ ހުއްދައާ ނުލައިކަމަށް ރިޕޯޓުތަކުން ބުނެއެވެ.
މައުލޫމާތު ލިބިފައިވާގޮތުގައި މެސީގެ މިދަތުރަކީ ސައުދީ އަރަބިއްޔާގެ ފަތުރުވެރިކަމާ ބެހޭ ވަޒީރު އަޙުމަދު އަލް ޚަތީބު ދެއްވި ދައުވަތަކަށް ކުރާ ދަތުރެެކެވެ. މެސީ އަކީ ސައުދީ އަރަބިއްޔާގެ ފަތުރުވެރިކަން ޕްރޮމޯޓްކޮށްދިނުމަށް ކަނޑައަޅާފައިވާ އެމްބެސަޑަރެއް ވެސް މެއެވެ. މިއީ މެސީ ސައުދީއަށް ދިޔަ ދެވަނަ ފަހަރެވެ.
ރިޕޯޓުތައް ބުނާގޮތުން ޕީއެސްޖީން މެސީ ސަސްޕެންޑުކޮށްފައިވަނީ ދެ ހަފްތާގެ މުއްދަތަކަށެވެ. މި މުއްދަތުގެ ތެރޭގައި މެސީއަށް އެ ޓީމު ކުޅޭ މެޗުތަކުގައިއާއި ފަރިތަކުރުންތަކުގައި ބައިވެރި ނުވެވޭނެއެވެ.
މީގެއިތުރުން އެ ކުލަބުން ވަނީ މެސީ ޖޫރިމަނާ ވެސް ކޮށްފައެވެ.
ޕީއެސްޖީން މެސީ ސަސްޕެންޑުކޮށްފައި މިވަނީ، މި ސީޒަން ނިމުމުން އޭނާ އެ ކުލަބު ދޫކޮށްލަން ނިންމާފައިވާ ކަމުގެ އަޑުތަކެއް ފެތުރިފައިވާ ދަނޑިވަޅެއްގައެވެ. މެސީއާ މެދު ޕީއެސްޖީގެ ސަޕޯޓަރުން ކަންކުރާ ގޮތާމެދު ގިނަ ބައެއްގެ ފާޑުކިޔުންތައް އެ ފަރާތްތަކަށް އަމާޒުވެފައިވެއެވެ.
ޕީއެސްޖީއާއެކު މެސީ ހަދާފައިވާ ދެ އަހަރު ދުވަހުގެ އެއްބަސްވުމުގެ މުއްދަތު ހަމަވާނީ މި އަހަރުގެ ޖޫން މަހުގެ ނިޔަލަށެވެ.
ޕީއެސްޖީއާއެކު މެސީ އެއްބަސްވުން އައުކުރާނެކަމަށް ނުބެލެވޭއިރު، އޭނާގެ ސޮއި ހޯދުމަށް، ގިނަ ކުލަބުތަކަކުން އަންނަނީ މަސައްކަތްކުރަމުންނެވެ. އެގޮތުން އެންމެ ބޮޑު ހުށަހެޅުންތަކެއް ހުށަހަޅަމުން އަންނަނީ ސައުދީ ލީގުގެ ކުލަބުތަކުންނެވެ. ސައުދީ އަރަބިއްޔާގެ އަލް ހިލާލް ކުލަބުން މެސީގެ ސޮއިހޯދުމަށް އޭނާގެ އެޖެންޓުންނަށް ރަސްމީކޮށް ބިޑު ހުށަހަޅާފައިވާއިރު، މިއީ 437,710,000 މިލިއަން ޑޮލަރުގެ (ހަތަރުސަތޭކަ ތިރީސް ހަތް މިނިއަން ހަތް ލައްކަ ދިހަ ހާސް) ހުށަހެޅުމެއް ކަމަށް ރިޕޯޓުތަކުން ބުނެއެވެ.
އެހެންނަމަވެސް މެސީ ބަދަވުމުގެ ފުރުސަތު އެންމެ ބޮޑީ އޭނާގެ ކުރީގެ ކުލަބު ބާސެލޯނާ އަށެވެ. ބާސާގެ ނައިބު ރައީސް، ރަފައެލް ވަނީ، އެ ކުލަބުން މެސީގެ އެޖެންޓުންނާއެކު މެސީ ބާސާއަށް ގެނައުމާބެހޭގޮތުން މަޝްވަރާކުރިކަން ހާމަކޮށްފައެވެ. މެސީ އަނބުރާ އެ ކުލަބަށް ގެންދިއުމަށް އޮތް އެންމެ ހުރަހަކީ، އޭނާ އެންމެފުރަތަމަ އެ ކުލަބު ދޫކޮށްލަން ޖެހުނު ސަބަބެވެ. އެއީ ލަލީގާގެ ފައިނޭންޝިއަލް ފެއާ ޕްލޭ އުސޫލެވެ. މި އުސޫލުގެ ސަބަބުން އަދިވެސް ބާސާއަށް މެސީގެ ސޮއި ހޯދުމުގައި ހުރަސްތަކެއް އެބަހުއްޓެވެ.
ބައެއް ރިޕޯޓުތަކުން ބުނާގޮތުގައި މެސީ ގެންދަން ބޭނުންނަމަ، ބާސާއިން އެ ޓީމުގެ ފަސް ކުޅުންތެރިއަކު ދޫކޮށްލަން ޖެހެއެވެ.