ޔޫއެންޑީޕީ ގްލޯބަލް އެންވައިރުމެންޓް ފެސިލިޓީގެ ދަށުން ހިންގޭ ސްމޯލް ގްރާންޓްސް ޕްރޮގްރާމްގެ އެހީ ލިބިގެން ނަލަފެހި މީދޫއިން ހިންގާ ރުއް އިންދާ ހެއްދުމުގެ ޕްރޮގްރާމްގެދަށުން ނަލަފެހި ޖަމްއިއްޔާއަށް ލިބުނު މުޑުވަށް ކާށީގެ ތެރެއިން ހުޅުދޫ އަވަށުން ކާށި ބޭނުންވެގެން ނަންނޯޓްކޮށްފައިވާ ފަރާތްތަކާއި ކާށި ހަވާލްކުރުމަށް 350 މުޑުވަށްކާށި ހުޅުދޫ އަވަށު އޮފީހާއި ހަވާލްކޮށްފިއެވެ.
ހުޅުދޫ އަވަށު އޮފީހާއި ހަވާލްކުރި 350 މުޑުވަށްކާއްށި ހަވާލްކުރުމަށް ހުޅުދޫ އަވަށު އޮފީހުގައި ބޭއްވުނު ރަސްމިއްޔާތެއްގައި ހުޅުދޫ އަވަށު އޮފީހުގެ ޑިރެކްޓަރ މޫސާ ސިއްދީގާއި ކާށި ހަވާލްކޮށްދެއްވީ ނަލަފެހި ޖަމްއިއްޔާގެ ނާއިބު ރައީސް ސިމާދު ޝަފީގެވެ.
ނަލަފެހި ޖަމްއިއްޔާގެ ފަރާތުން މައުލޫމާތު ލިބިފައިވާގޮތުގައި ހުޅުދޫ އަވަށު އޮފީހާއި ހަވާލް ކުރެވުނު 350 ކާށި ގޭގެއާއި ހަވާލްކުރުމަށް ހަމަޖެހިފައިވަނީ ނަންނޯޓް ކޮށްފައިވާ ކޮންމެ ގެއަކަށް 2 ކާށި ހަވާލްކުރާގޮތަށެވެ.
ނަލަފެހިން ކުރިއަށް ގެންދަވާ ރުކުގެ އައު ޖީލެއް އުފެއްދުމުގެ ޕްރޮގްރާމްގެ ދަށުން ނަލަފެހިއަށް ލިބިފައިވާ މުޑުއްވަށްކާށީގެ ތެރެއިން ކާށި ބޭނުންވެގެން ނަންނޯޓްކުރި ހުޅުދޫ ދަނޑުވެރީންގެ ތެރެއިން ކޮންމެ ދަނޑުވެރިއަކަށް މީގެ ކުރީން ވަނީ 10 ކާށި ހަވާލްކޮށްފައެވެ.
ނަލަފެހިން ދޫކުރާ މުޑުވައް ކާއްޓަކީ ރާއްޖެން ބޭރުން ގެނެސްފައިވާ ހައިބްރިޑް ކޮކްނެޓްގެ މުޑުވައްކާއްޓެކެވެ. ހައިބްރިޑް ކޮކްނެޓަކީ ސައިންޓިފިކް ގޮތުން ބަދަލުކޮށްފައި ހުންނަ މުޑުވައްކާޓެކެވެ. މިކާށިން ފަޅާ ރުކަކީ ތިރިކޮށްހެދޭ ، މަތިވަރު ރަގަޅުރުކެކެވެ. ހައިބްރިޑް ކާށިން ފަޅާ ރުއް ރަގަޅަށް ބެލެހެއްޓި އަދި ރަގަޅަށް ހެއްދިއްޖެނަމަ 2 އަހަރު ދުވަހުތެރޭގައި ރުއް ފޯދި ކުރުން ކުރުބާ ލިބޭނެކަމަށް ނަލަފެހިން މައުލޫމާތު ދީފައިވެއެވެ.